MEJD sei halo justifikasaun bainhira pagamentu bolsa méritu la konklui
DILI, 10 fevereiru 2023 (TATOLI)–Diretór Jerál Administrasaun no Jestaun Finansa, Antoninho Pires, hateten bainhira pagamentu bolsa méritu ba estudante 13.517 iha territóriu nasionál mak la konklui iha fevereiru nia rohan, MEJD tenke halo justifikasaun atu osan ne’e labele fila ba kofre estadu.
Notísia Relevante: PN bolu urjente Ministru Edukasaun atu esplika implementasaun bolsa méritu
DG Administrasaun Finansas ne’e informa katak, “Durasaun tempu ba pagamentu bolsa méritu ne’e tuir loloos hotu ona, maibé sei fó tan tempu to’o fevereiru ne’e ramata. Buandu fevereiru liu mak pagamentu la konklui ne’e, ita tenke halo fali ona justifikasaun. Se lae, tuir lei, osan ne’e tenke fila-fali ba kofre Estadu,” Antoninho Pires hateten ba Agência Tatoli iha nia kna’ar fatin, Vila Verde, sesta ne’e
Esforsu ne’ebé Ministériu Edukasaun halo daudaun ne’e, oinsá estudante sira bele hetan lalais sira-nia konta bankária atu nune’e Ministériu bele prosesa ona transferénsia osan ba sira ida-idak ninia konta bankária.
Tanba, nia hateten, orsamentu millaun $7.5-resin ne’ebé mak ministériu prevee ona ba pagamentu bolsa méritu ne’e iha mós lei GOP ne’ebé mak regula, signifika Ministériu Edukasaun la utiliza ho didi’ak iha tempu ne’ebé termina ona, osan ne’e tenke fila ba kofre Estadu.
Tanba, durante ne’e lista pagamentu ba estudante bolsa méritu sira-ne’e foti hosi eskola ensinu báziku sentrál de’it.
Hosi dadus sira-ne’e mak inklui ona klase paralelu no mós eskola filiál sira, ne’eduni klase paralela no eskola Filiál sira laiha dalan atu hatama sira nia lista ketak.
“Ha’u hakarak dehan klase paralela ne’e la’ós eskola ne’ebé sira-nia lista tama tuir ona eskola sentru ne’ebé harii klase paralelu. Ne’eduni, kuandu sira la hetan bolsa méritu ne’e tanba lei mak la fó dalan. Tanba sira-nia lista inklui eskola filiál tenke tuir eskola sentrál,” nia dehan.
Notísia Relevante: Prosesu bolsa méritu tarde, millaun $7,2 sei hatama ba kofre Estadu
Jornalista : Tomé Amado
Editór : Cancio Ximenes
