DILI, 13 fevereiru 2023 (TATOLI) – Ekipa Autoridade Aduaneira (AA/Alfándega) hamutuk ho Timor Port halo inspesaun ba kontentór importadu sira besik 100 kada loron.
“Alfándega mak halo inspesaun, maibé ami-nian ekipa tenke lori kontentór bá tau iha fatin inspesaun no jere fatin hodi fasilita hatún kontentór lalais para bele halo inspesaun”, Diretór Timor Port, Rafael Robeiro, hatete ba Agência Tatoli, iha Portu Baía Tibar, segunda ne’e.
Nia esplika Alfándega hakarak aumenta volume fiskalizasaun, maibé tanba ekipamentu ba área inspesaun limita, nune’e halo tarde uitoan iha prosesu inspesaun ba kontentór sira, nune’e kliente balun kestiona kona-ba atrazu, tanba bainhira tarde sira kontinua selu taxa.
Notísia relevante: Empreza importadora deside haruka fila kontentór tanba laiha kapasidade selu taxa
Responsavel Timor Port ne’e hatutan ba serbisu sira ein koordenasaun ho Governu la’o di’ak tebes tanba hetan apoiu másimu no ba operasaun nian mós la’o ho forma adekuada.
“Maibé iha empreza importadora balun kestiona kona-ba autoridade balun hanesan Ministériu Turizmu, Komérsiu no Indústria tanba bainhira atu halo inspesaun sira sempre mai tarde. Maibé ne’e la’ós ami-nian kompeténsia atu hatete ba sira. Ami só reklama ba autoridade kompetente para sira bele hadi’a no ne’e la’ós tama iha ami-nian jestaun”, nia salienta.
Timor Port halo jestaun tomak ba iha Portu Tibar inklui área inspesaun nian, maibé autoridade pesoál ne’e mak Timor Port labele jere. “Kuaze jestaun hothotu iha portu ne’e iha responsabilidade Timor Port, maibé autoridade mak la’e, só informa”, konklui.
Jornalista: Antónia Gusmão
Editora: Maria Auxiliadora
