SEFOPE sei aprezenta rezultadu estudu viabilidade sentru exelente Metinaro ba PM
DILI, 14 fevereiru 2023 (TATOLI)–Diretór Jerál Sekretária Estadu Formasaun Profisionál Empregu, Paulo Alves, hateten iha tempu badak SEFOPE sei aprezenta rezultadu estudu viabilidade sentru profisionál exelente Metinaro ba Primeiru-Ministru (PM), Taur Matan Ruak, nune’e molok mandatu VIII Governu Konstitusionál ramata bele hatuur ona fatuk dahuluk.
Notísia Relevante: Governu harii sentru formasaun téknika profisionál ba joven sira iha Metinaro
“Tempu badak ita sei aprezenta relatóriu estudu viabilidade ne’e ba SEFOPE depois ba Ministru Koordenadór Asuntu Ekonómiku no ikus ba Primeiru-Ministru, atu nune’e molok mandatu VIII Governu ramata, ita bele hahú ona primeira pedra ba dezenvolvimentu harii sentru profisionál exelente iha Metinaro,” Paulo Alves hateten ba Agência Tatoli iha edifísiu SEFOPE, Caicoli, tersa ne’e.
Tanba, nia hateten, sentru exelente ne’e rasik agora daudaun hahú tiha ona ho estudu viabilidade ne’ebé hala’o hosi kompañia internasionál Munly hosi Portugál mak manán projetu ne’e. rezultadu konklui ona no agora hein de’it ninia relatóriu sira.
Kona-ba harii sentru exelente ne’e, nia dehan, mai hosi Sentru Formasaun Profisionál Empregu (SEFOPE) maibé servisu ne’e la’ós SEFOPE mesak mak halo de’it, presiza envolve mós Ministériu sira ne’ebé iha relevante ho sentru formasaun exelente ne’e.
Rezultadu hosi estudu viabilidade ne’e bainhira kompañia internasionál ne’e mak aprezenta ona relatóriu iha tempu badak, bele konsidera iha ona dalan atu SEFOPE bele kontinua relata ba xefe Governu hodi hetan apresiasaun molok foti desizaun atu halo serimónia tau fatuk dahuluk.
Sentru profisionál exelente ne’ebé atu harii iha Metinaro ne’e ho medida rai ninia luan kuaze ektare 25 ne’e konsidera di’ak iha Azia Pásifíku, maibé atu garante kualidade ba sentru exelente ne’e la’ós buat ida fasil maibé servisu ida todan.
Tanba ne’e, presiza iha kolaborasaun, kooperasaun no kontribuisaun ho entidade hotu hodi bele prepara formasaun ida ho kualidade ba timoroan sira atu bele responde ba merkadu rai-laran no internasionál liu-liu iha Azia Pásifiku.
Tanba, tuir nia, benefísiu bainhira harii sentru profisionál exelente ne’e kuaze joven timoroan sira mak sei aproveita tanba sira mak sei kapasita nia-an iha área koñesimentu tékniku espesífiku hanesan konstrusaun, ospitalidade, eletrisidade no área sira seluk iha sentru ne’e.
Bainhira sentru ne’e harii ona, kada tinan sei prodús joven iha área oioin ho kualidade mínimu entre 5000 to’o 8.000.
Sentru exelente ne’e bainhira harii ona, sentru SENAI ne’ebé eziste iha Becora no Sentru Tibar sei muda hotu ba Metinaro no sentru rua ne’e mak sei jere sentru profisionál exelente ne’e.
Tanba ne’e, atu ko’alia kona-ba kualidade sei haree mós ba kompetisaun abilidade, ne’eduni manorin sira-ne’ebé atu hanorin iha sentru exelente ne’e mós presiza ema-ne’ebé iha kapasidade sufisiente, atu nune’e bele forma karáter joven sira ho kualidade duni.
Bainhira sentru ne’e harii ona, Governu mós sei husu apoiu manorin hosi nasaun Austrália, Indonézia, Filipina, Singapura no Tailándia atu mai reforma iha sentru ne’e, tanba ba futuru Timor-Leste sei tama mós iha nasaun membru ASEAN.
Ne’eduni, nia hateten, VIII Governu Konstitusionál prepara joven sira hahú agora, atu nune’e ba futuru rekursu umanu Timor nian bele kompete iha merkadu traballu ne’ebé sei mai iha tinan lima ba oin.
Kona-ba orsamentu ba konstrusaun sentru exelente ne’e. nia hatán, nia parte seidauk bele informa detallu tanba estudu viabilidade sei la’o hela bainhira tama ona ba dezeñu no Planta no Kadrenu Enkargu (BoQ) inklui detallu enjiñeiru degine (DED) mak foin hatene kona-ba orsamentu hira mak sei tau ba konstrusaun sentru profisionál exelente ne’e.
Jornalista : Tomé Amado
Editór : Cancio Ximenes
