DILI, 15 fevereiru 2023 (TATOLI) – Diretór Arbitrajen Federasaun Futeból Timor-Leste (FFTL) Nivio da Costa Fernandes, dehan árbitru hamutuk 49 preparadu no sei dirije jogu durante liga époka 2022-2023 ne’ebé sei realiza iha semana ne’e.
“Durante semana tolu ita halo preparasaun ba árbitru sira ne’ebé mak atu dirije liga iha tinan ne’e nian, hamutuk 49, sira ne’e ita halo teste no konsege liu hotu, sira mak sei tun duni, sira preparadu ona”, Nivio hateten ba Agência TATOLI iha edifisiu FFTL, ohin.
Nia dehan, árbitru hirak ne’e, balun iha Dili no balun mai hosi munisípiu ne’ebé besik, hanesan Liquiça, Ermera no Aileu, enkuantu balun la mai tanba kestaun distánsia.
“Árbitru ne’ebé ita deside, tun iha liga agora ne’e la hanesan ho tinan sira ba kotuk ne’ebé utiliza adisionál assitente refree, maibé tinan ne’e ita la uza tanba iha razaun balu hanesan, adisionál refree ne’e tenke iha formasaun ketak ida bainhira fó ona formasaun ne’e mak ita bele autoriza nia tun, maibé ita agora seidauk, entaun ita la utiliza adisionál assistente refree”, nia informa.
Tuir dadus ne’ebé iha, totál árbitru iha Timor-Leste ne’ebé hetan lisensa hosi Asian Football Confederation (AFC) no Federation International Football Asosiation(FIFA) hamutuk 567.
Hosi númeru ne’ebé iha, lisensa A hamutuk na’in rua, lisensa B hamutuk na’in 20-resin no seluk ne’e C ho D, tanba ne’e, diresaun arbitrajen sei la halo tan rekrutamentu ba árbitru foun maibé so halo refresh de’it ba árbitru tuan hirak ne’e, atu bele dirije jogu sira ho di’ak iha teritóriu nasionál.
Jornalista:Hortencio Sanchez
Editór : Zezito Silva
