Enjeñeiru DNDPE ida hetan medida sansaun hosi Ministru Armindo
DILI, 15 fevereiru 2023 (TATOLI)–Ministru Edukasaun Juventude no Desportu (MEJD), Armindo Maia, konsidera serimónia inaugurasaun eskola 94 iha Baucau foin lalais ne’e, iha eskola rua mak seidauk konklui konstrusaun fíziku 100% maibé inaugura dala ida.
Notísia Relevante: PM Taur inaugura PKRE iha EBF Daitula Maucale Gariuai
Tanba ne’e, Ministru Armindo hatutan, ba kestaun ne’e nia parte foti ona medida hasoru enjeñeiru balun hosi Dirasaun Nasional Dezenvolvimentu Parque Eskolár (DNDPE) iha Ministériu Edukasaun Juventude no Desportu (MEJD) nian.
“Ami rekoñese iha eskola rua mak ninia konstrusaun fíziku ne’e seidauk konklui 100% maibé hetan ona inaugurasaun hamutuk ho eskola 94 iha foin lalais ne’e. Tanba ne’e mak ha’u foti medida no fó sansaun be nejeñeriu balun iha DNDPE,” Armindo Maia hateten ba jornalista sira iha nia kna’ar fatin, Vila Verde, kuarta ne’e.
Governante ne’e konsidera, fallansu ne’ebé akontese ne’e la’ós mai hosi sira iha leten maibé fallansu ne’e akontese mai hosi kraik, katak enjeñeiru sira mak la pasa informasaun ho loloos tanba ne’e Ministériu la delega ekipa sira ba halo prosesu verifikasaun.
“Ami-nia enjeñeiru sira mak la fó informasaun ho loloos mai ami maibé ha’u foti ona medida hasoru ami-nia enjeñeiru ne’e,” nia dehan.
Nune’e, nia parte bolu ona atensaun ba dirasaun no atu haree aselera lalais prosesu konstrusaun fíziku ba eskola rua ne’e molok fulan-fevereiru ramata bele konklui ona obra refere.
Entretantu Deputadu Bankada Partidu Demokrátiku, Antonio da Conceição preokupa kona-ba eskola ida iha Munisípiu Ainaro ninia prosesu konstrusaun fíziku ne’e seidauk konklui 100% maibé eskola ne’e hetan ona inaugurasaun.
Haree ba aktu sira-ne’e, deputadu Antonio hakarak hatene razaun Ministériu Edukasaun atu esplika motivu saida mak eskola seidauk konklui 100% bele hetan ona inaugurasaun ne’e, karik Ministériu Edukasaun hakarak hateten ba públiku katak sira iha duni obra ka.
Entretantu Diretór Nasionál Dezenvolvimentu Parque Eskolár (DNDPE), Agostinho Soares rekoñese iha eskola rua hosi transferénsia públiku mak hetan atrazu ninia prosesu konstrusaun mak eskola ensinu báziku rua iha munisípiu Manatuto-Aiteas.
Tuir nia, akontesimentu ne’e mosu tanba relatóriu hosi tékniku sira-nian ne’e tama ba tinan ikus, tanba sira nu’udar tékniku sempre halo previzaun karik mosu kazu ruma iha tinan ikus rekomendasaun pagamentu hosi ADN ne’e lalais, entaun previzaun tékniku sira sei la atinje to’o inísiu fulan-janeiru 2023.
Maibé tanba rekursu ADN menus prosesu verifikasaun no rekomendasaun pagamentu atrazu, ne’eduni hamosu implikasaun ba ida-ne’e.
Purtantu, Ministru rasik rekoñese fallansu sira-ne’e tanba agora daudaun materiál konstrusaun kompletu no pagamentu la’o ona, no konstrusaun fíziku ba eskola sira-ne’e mós la’o ona.
“Ita-nia badaen no grupu komunitária sira kompromete katak antes fulan-fevereiru ikus sira bele konklui ona obra ne’e 100%,” nia dehan.
Jornalista : Tomé Amado
Editór : Cancio Ximenes
