Janeiru no meadu fevereiru MS rejista kazu dengue 182 no óbitu tolu
DILI,15 fevereiru 2023 (TATOLI) — Xefe Departamentu Vijilánsia no Epidemolojia iha Ministériu Saúde Filipe Nerio, informa fulan janeiru to’o meadu fevereiru, Ministériu Saúde rejista kazu dengue hamutuk 182 no mate na’in tolu.
“Durante fulan janeiru to’o agora, ita iha kazu dengue hamtuk 182 no mate na’in-tolu husi kazu óbitu ne’e, ida husi Munisípiu Lautem no na’in-rua husi Dili”, Filipe Nerio, dehan bainhira halo media interface iha salaun MS Caicoli, ohin.
Nia hateten, husi janeiru to’o ohin loron, labarik sira ne’ebé afeta ba kazu dengue, maioria idade tinan lima to’o 14 no husi tinan ida to’o tinan haat.
“Ita komapra ba munisípiu sira ladún maibé munisípiu Dili mak kazu barak hamutuk 102, husi númeru ne’e, postu adminsitrativu Dom Aleixo mak barak”, nia subliña.
Nia esplika, kazu dengue, iha ekipa saúde bele kontrola maibé presepsaun husi komunidade mak sei problema, tanba maioria inan ho aman servisu husik oan mesak iha uma bainhira moras mak iha koñesimentu katak fó uluk parasetamol depois isin manas tun sira hanoin di’ak ona, maibé liu loron tolu labarik hahú grave mak halai ba fasilidade saúde maibé atrazu ona ba diagnóstiku.
“Dalabarak labarik afeta ona kazu dengue, inan aman lori ba fasilidade saúde ho tarde signifika krítiku ona entaun médiku sira labele halo buat ida maske esforsu másimu husi profisionál saúde sira iha fasilidade saúde sira”, nia dehan.
Tanba ne’e, nia husu ba komunidade katak bainhira labarik sira isin manas ho sintoma dengue tenke lori lalais ba fasilidade saúde ne’ebé mak besik hodi deteta sedu.
“Ita haree komunidade nia koñesimentu ba deteta sedu ba kazu dengue sei menus, tanba sira lori labarik ba falilidade saúde ho grave. Entaun bainhira etapa krítiku ona to’o iha fasilidade saúde ita la bele halo intervensaun ne’ebé mak mais di’ak liu ”, nia akresenta.
Nia informa, dengue sai nafatin problema saúde publika iha Timor-Leste iha kada tinan, tanba ne’e atividade atu halo prevensaun, MS halo antes udan monu rai maibé koordenasaun no konsiénsia sei menus husi komunidade sira.
Jornalista : Felicidade Ximenes
Editór : Zezito Silva
