Preparativu mínimu, Porto Taibessi prontu enfrenta jogu ho Aitana
DILI, 15 fevereiru 2023 (TATOLI) – Treinadór prinsipál Porto Taibessi FC Miro Baldo Vento, hateten tinan ida resin ona, jogu la la’o, jogadór barak ladún preparadu maibé Porto Taibesi prontu joga hasoru Aitana FC, iha abertura Liga Futeból Timor-Leste, époka 2022-2023, iha Estádiu Munnisipál Dili, sesta semana ne’e iha tuku 16:00 to’o hotu.
“Ita hatene durante tempu naruk mak jogu iha ita nia rai-laran paradu, klube hotu nia preparasaun minimu inklui ami, maibé ami nafatin preparadu no prontu kontra Aitana iha jogu abertura ne’e”, treainadór dehan ba jornalista sira iha Estádiu Dili, ohin.
Nia dehan, Porto Taibessi nia jogadór kompletu ona tuir kritéria ne’ebé mak LFTL fó sai katak jogadór ba primeira divizaun hamutuk 27.
Iha fatin hanesan, Treinadór prinsipál Aitana FC José Carlos da Fonseca, dehan jogadór sira nia preparativu mínimu tebes tanba foin mak semana rua-resin, ida ne’e bele fó impaktu ba kondisaun fíziku jogadór nian maibé sira buka meiu hotu atu bele partisipa másimu iha jogu ne’e.
“Ami nia preparasaun foin mak semana rua-resin, maibé ami sei partisipa másimu iha jogu ne’e tanba ita nia situasaun mak nune’e duni, iha jogu primeiru ida ne’e ami tenke fó supreza ba ami nia ekipa, tanba ami nia ekipa foun hotu, hosi estrutura to’o treinadór”, nia konklui.
Jornalista:Hortencio Sanchez
Editór : Zezito Silva
