Prezidente Repúblika vizita hodi haree besik kondisaun ospitalár
DILI, 15 fevereiru 2023 (TATOLI) – Prezidente Repúblika José Ramos Horta halo vizita ba Departamentu Oftamolojia iha Hospital Nasional Guido Valadares (HNGV).
Iha vizita ne’e Xefe Estadu husu ba Ministériu Saúde atu tau orsamentu másimu ba setór saúde liuliu HNGV ho objetivu atu hadia kualidade atendimentu.
”Iha tinan hira nia-laran ne’e nunka tau orsamentu loloos ba setór saúde, ezemplu malae ruma ka embaixada ruma derepente moras mai sala VIP HNGV, haree fatin hanesan ne’e sira aumenta estroke tan tanba haree ba kulsaum tuan, lensol foer, haris fatin foer, entaun ida ne’e ita presiza hadia”, Xefe Estadu dehan bainhira remata vizita ba Departamentu Oftamolojia iha HNGV, ohin.
Nia husu ba Ministériu Saúde atu tau prioridade ba setór saúde nomedamente iha HNGV, atu pasiente hotuhotu halo tratamentu iha rai-laran de’it, duke haruka ba rai-liur.
”Ha’u husu ba MS tenke tau prioridade ba setór saúde liuliu HNGV atu halo tratamentu iha rai laran dúke haruka ba rai liur. Tanba durante ne’e ita haruka pasiente sira ba halo tratamentu iha Indonesia, Malasia no singapura, oinsá osan sira ne’e ita investe fila fali ba ospitál ne’e atu halo tratamentu iha ita-nia railaran”, nia revela.
Nia esplika, fasilidade ba matan nian, presiza aumenta tan no presiza manutensaun, atu bele uza hodi trata pasiente sira ho di’ak.
”Husu ba diresaun ospitál sira tenke aprezenta planu no programa sira atu MS tenke haree didiak hodi lori ba Konsellu Ministru atu sira aprova hodi hetan orsamentu ne’ebé mak loos”, nia refere.
Iha fatin hanesan, Diretór Ezekutivu HNGV Alito Soares, agradese ba Prezidente Repúblika nia tempu mai vizita HNGV liuliu iha departamentu Oftamolojia.
”Ita nia Prezidente Repúblika mai vizita departamentu oftamolojia hodi haree kona-ba ekipamentu no rekursu umanus tanba matan ne’e sai problema ba saúde publika iha ita-nia rain”, Alito konklui.
Jornalista : Felicidade Ximenes
Editór : Zezito Silva
