Aban Forensik entrega mate isin Riando Falo ba família
DILI, 16 fevereiru 2023 (TATOLI) – Xefe Departamentu Forensik iha Hospitál Nasionál Guido Valadares (HNGV), Nilton Tilman, informa médiku sira halo ona autopsia ba mate isin Riando falo no aban entrega ba família hodi halo serimónia funeral.
“Horseik dader ita halo ona autopsia ba alin mane ne’ebé lakon ona vida iha Ramelau ne’e, agora daudaun mate isin ita tau konzeladór iha ne’e no aban dader ita entrega ba família hodi halo serimónia funebre”, Nilton Tilman dehan ba TATOLI, ohin.
Nia hateten, rezultadu autopsia hosi matebian Riando Falo, Forensik la fó sai ba públiku, maibé submete ba Ministériu Públiku hafoin sira deklara rezultadu autopsia ne’e.
“Rezultadu ne’e ita hato’o ba Ministériu Públiku tanba ita hatene katak media sosiál kobre barak ona kona-ba alin nia asidente iha Ramelau bainhira hetan tiha alin ne’e, ekipa seguransa sira lori ba Ospitál referál Maubesi depois transporta mai HNGV, entaun pelumenus informasaun ne’ebé mak ita hotu akompaña iha media ne’e, husi parte ha’u haree seidauk ida mak iha indikasaun ba violénsia mais ita lahatene maibé parte ami nian, halo hotu ona autopsia ida ne’e”, nia afirma.
Nia subliña, Polísia Investigasaun Kriminál mak sei ezekuta buska ba kazu ida ne’e tanba sira mak sei hatene liu kona-ba informasaun ne’ebé iha relasaun ho kronolojia.
Notísia relevante : Ekipa hetan-evakua joven ida lakon iha Ramelau mai Ospitál Maubisse
Jornalista : Felicidade Ximenes
Editór : Zezito Silva
