Ekipa konjunta hetan ona Orlando Martins ho kondisaun mate

DÍLI, 16 fevereiru 2022 (TATOLI) – Komandante Polísia Nasionál Timor-Leste (PNTL) Munisípiu Ainaro, Superintendente Polísia, Paulino Carmo Perreira, informa, ekipa konjunta hetan ona joven Orlando Martins iha área iha Ramelau Postu Administrativu Hatubilico, Munisipiu Ainaro maibé lakon ona vida.
“Sim, ita-nia ekipa konjunta hetan ona, ita-nia alin ne’ebé ho naran Orlando Martins hetan ona, besik fatin peregrinasaun Nain Feto Ramelau nian área Mata Dotu, dalan besik ba Atsabe, maibé alin ne’e ho kodisaun mate ona”, Superintendente Polísia, Paulino Carmo Perreira dehan ba Agência TATOLI, kinta, ohin.
Matebian Orlando Martins nu’udar joven ida ne’ebé antes ne’e la’o hamutuk ho nia-kolega matebian Riando Falo hodi ba vizita Inan Na’in Feto Ramelau iha 8 fulan fevereiru 2023.
Hafoin peregrinasaun ba foho Ramelau, joven nain-rua ne’e lakon iha sira-nia peregrinasaun iha Ramelau. No ekipa konjunta, loron (14/2), hetan uluk matebian Riando Falo, nune’e ekipa konjunta evakua kedan hosi área Ramelau nia mai vila.
“Hanesan ohin dader, ha’u informa ona katak hafoin ekipa konjunta hetan tiha alin joven nain ida ho naran Riando Falo iha área Ramelau hodi evakua. No ita-nia ekipa konjunta kontinua buka tuir joven ida seluk ho naran Orlando Martins no iha tuku 14:10 loraik ne’e ita-nia ekipa konjunta konsege hetan ita-nia joven ne’e iha fatin perigrinasaun Ramelau maibé alin ne’e ho kodisaun mate ona”, Paulino Carmo konklui.
Jornalista: Natalino Costa
Editór : Zezito Silva

