Mehi Karketu Dili FC mantein títulu kampiaun
DILI, 16 fevereiru 2023 (TATOLI) – Treinadór klube primeira divizaun Karketu Dili FC Antonio Timotio, iha mehi atu mantein nafatin títulu kampiaun ba Liga Futeból Timor-Leste (LFTL) hanesan tinan 2021 maibé iha jogu mak sei bele determina.
“Ita hanoin atu mantein nafatin títulu ne’e maibé iha jogu mak sei determina, kuandu dalan nakloke ba vitória hanesan tinan rua kotuk ami agradese maibé ida ne’e mak ami nia esforsu”, treinadór dehan iha Estádiu Munisipál Dili, ohin.
Nia dehan, Karketu nia jogu primeiru sei kontra Atletico Ultramar/Coração iha sabadu semana ne’e iha Estádiu Munisipál Dili tuku 16:00 loraik, hakarak tenke manán.
“Objetivu mak tenke manán iha jogu primeiru ne’e, maibé ami nia preparasaun minumu tebes, ne’e laos ami de’it klube hotu mós preparasaun mínimu, maibé ami nia jogadór sira hotu preparadu atu joga hodi manán iha jogu primeiru”, Antonio dehan.
Iha sorin seluk, treinadór Atletico Ultramar/Coração Januario de Almeida, informa preparadu atu kompete iha jogu ne’ebé sei akontese 18 fevereiru semana ne’e kontra Karketu Dili FC.
“Ami nia preparasaun limitadu tebes maibé ami otimista sei manán Karketu iha jogu primeiru ne’e, ami treinu makas ho objetivu atu manán tenke manán”, treinadór dehan.
Nia hatutan, daudaun ne’e, Coração iha jogadór estranjeiru hosi Indonézia maibé seidauk bele fó sai naran no pozisaun jogadór nian bainhira tun ona iha kampu mak públiku bele haree direita.
Jornalista:Hortencio Sanchez
Editór : Zezito Silva
