iklan

NASIONÁL, EDUKASAUN, DILI, HEADLINE

Profesór voluntáriu iha Metinaro la hetan direitu sai profesór kontratadu

Profesór voluntáriu iha Metinaro la hetan direitu sai profesór kontratadu

Profesór voluntáriu sira iha Munisípiu Dili, haree naran iha kuadru avizu Diresaun Servisu Edukasaun Munisipiu Dili, iha Comoro, tersa-feira (23/08). Imajen Tatoli/ Isaura Lemos.

DILI, 16 fevereiru 2023 (TATOLI)–Profesór voluntáriu na’in-lima ne’ebé hanorin iha eskola ensinu báziku sentrál, ensinu báziku filiál no edukasaun pre-eskolár (EPE) iha Metinaro ne’ebé dedika an durante tinan neen (6), la hetan direitu kontratu sai profesór kontratadu.

Notísia Relevante: MEJD kontrata ona profesór voluntáriu 1.715 sai profesór kontratadu

Diretór Eskola Ensinu Báziku Sentrál (EBC, sigla portugés) Metinaro, Duarte Amaral, hateten profesór voluntáriu na’in-lima ne’ebé sira-nia dokumentu hetan ona selesaun hosi ekipa painél  juri Ministériu Edukasaun Juventude no Desportu (MEJD) hamutuk ho profesór voluntáriu sira seluk iha territóriu nasionál maibé sira nia dokumentu la pasa.

“Ha’u hakarak dehan, ha’u-nia profesór voluntáriu na’in-lima ne’e dedika sira nia vida hodi hanorin iha Metinaro ne’e dezde 2014 to’o 2023 ne’e, ha’u bele dehan sira frekuente ona hanorin iha eskola EBC, EBF no EPE iha Metinaru ne’e kuaze tinan neen (6) ona maibé sira la hetan diretu kontratu hosi MEJD sai professor kontratadu,” Duarte Amaral hateten ba Agência Tatoli liuhosi telefóniku, kinta ne’e.

Profesór voluntáriu na’in-lima ne’eb’e hanorin iha eskola Metinaro ne’e kompostu profesór EBC na’in-ida (1), EBF na’in-rua (2) no EPE na’in-rua (2), no sira na’in-lima ne’ebé sira-nia dokumentu la pasa ne’e mak Urbano Simão da Silva Dias, David Mendonça Gusmão, Yohana Angela Monik, Juliana dos Santos Sarmento no profesora Santina Maria José Damião Maia.

Profesór voluntáriu Urbano da Silva Diaz hanorin iha eskola Ensinu Báziku Central (EBC) Metinaro dezde 2014, profesór David Mendonça Gusmão no Yohana Angela Monik hanorin iha eskola Ensinu Báziku Filiál (EBF) Wenunuk dezde 2014 no profesora Juliana dos Santos Sarmento no Santina Maria José Damião Maia hanorin iha Edukasaun Pre-Eskolár (EPE) São João Maria Vianey Metinaro mós hanorin dezde 2014 to’o ohin loron.

Entretantu, parte eskola prepara ona prosesu reklamasaun eskrita no segunda feira aprezenta ba Diresaun Servisu Edukasaun Munisipál Dili atu verifika depois bele submete ba Ministériu Edukasaun hodi prosesa.

Jornalista : Tomé Amado

Editór       : Cancio Ximenes

iklan
iklan

Leave a Reply

iklan
error: Content is protected !!