Aldeia rua iha Guda asesu ona elétrika
BOBONARO, 17 fevreiru 2023 (TATOLI)-Komunidade aldeia rua iha suku Guda, postu administrativu Lolotoe, munisípiu Bobonaro, asesu ona liña elétrika hosi VII Governu Konstitusionál.
Xefe suku Guda, Caetano Francisco, esplika aldeia rua ne’e iha sentru suku mak hanesan Oseli no Zol-Pho.
Notísia relevante: Komunidade Guda iha Lolotoe 80% simu ona vasina AstraZeneca
“Uma-kain ne’ebé mak instala ona eletrisidade ne’e hamutuk 152 mak agora ahi lakan ona, ne’e hosi projetu orsamentu 2021, agora seidauk inaugura maibé tuir oráriu ne’ebé ami simu katak dia 25 agora mak foin mai halo inaugurasaun,” nia informa ba Jornalista Tatoli, sesta ne’e.
Autoridade lokál ne’e subliña, daudaun ne’e komunidade sira sei uza gratuita.
Xefe suku Caetano lori komunidade nia naran agradese ba governu tanba liuhosi projetu ne’e bele lori povu sai hosi nakukun, ne’ebé enfrenta durante tinan 20.
Maske aldeia rua asesu ona maibé iha aldeia rua seluk hanesan Guda-Taz ho totál uma-kain 37 no Anon 56 to’o ohin loron seidauk asesu enérjia elétrika.
“Ami espera katak governu sei la taka matan, ami ezije nafatin aldeia rua ne’e mós tenke lakan hotu tanba sente ida ne’e la balansu, ne’ebé ami husu governu nafatin tau prioridade tanba sira agora uza de’it solar sel ne’ebé sira sosa rasik,” nia dehan.
Enkuantu projetu eletrifikasaun ne’e implementa iha tinan kotuk tama iha pakote nasionál 34 ho distánsia kuaze kilómetru rua.
Notísia relevante: EDTL finaliza ona projetu liña eletrifikasaun komunitária tolu iha Bobonaro
Jornálista:Sérgio da Cruz
Editór: Evaristo Soares Martins
