Profesór asosiadu adjuntu 32 iha UNTL hetan progresu
DILI, 17 fevreiru 2023 (TATOLI)–Profesór asosiadu adjuntu hamutuk 32 iha Universidade Nacional Timor Lorosa’e (UNTL) hetan progresu ba grau nivel B3 bazea ba alterasaun rejime karreira ne’ebé promulga ona hosi Prezidente Repúblika iha agostu 2022 liubá.
Notísia Relevante: Dekanu foun husu UNTL prevee fundu harii laboratóriu ba FEAH
Reitór Universidade Nacional Timor Lorosa’e, João Soares Martins deklara katak profesór asosiadu adjuntu ne’ebé hetan progresu ne’e foin akontese iha Timor-Leste iha UNTL mak sai Instituisaun Ensinu Superior primeiru hetan uluk profesór asosiadu adjuntu kompara ho Instituisaun Superiór sira seluk.
“Ita iha ona planu, marsu agora sei halo aprezentasaun ba públiku kona-ba profesór asosiadu adjuntu ne’ebé UNTL nian, ne’ebé mak hetan progresu,” João Martins hateten ba jornalista sira hafoin remata serimónia tomada de posse ba Dekanu FEAH foun ne’ebé realiza iha sala auditoria Liceu, sesta ne’e.
Nia dehan, planu Universidade nian bazea ba progresu ne’ebé profesór asosiadu adjuntu 32 hatudu ne’e, sira sei aproveita tempu iha fulan-marsu serimónia graduasaun UNTL nian atu promove mós ba públiku kona-ba progresu sira-ne’e.
Profesór asosiadu adjuntu 32 ne’e, hetan nomeasaun ba grau nivél B3 ne’e tanba oportunidade hosi alterasaun rejime karreira ne’ebé promulga ona hosi Prezidente Repúblika iha fulan Agostu 2022 liubá.
“Tanba rejime karreira ne’ebé hetan ona promulgasaun hosi ita-nia Prezidente Repúblika iha 2022 ne’e mak UNTL sai instituisaun ida primeiru iha profesór asosiadu adjuntu ba grau nivél B3. Lista profesór sira-ne’e hetan ómologasaun iha janeiru foin lalais ne’e,” nia dehan.
Jornalista : Tomé Amado
Editór : Cancio Ximenes
