Autoridade RAEOA inaugura postu saúde Tumin fasilita komunidade aldeia tolu
OÉ-CUSSE 20 fevereiru 2023 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), lideradu Arsénio Paixão Bano, inaugura postu saúde no residénsia ba profisionál saúde iha aldeia Tumin, suku Bobometo, sub-rejiaun Oésilo, hodi fasilita komunidade aldeia tolu bele asesu fasilidade saúde ho besik.
“Ohin ha’u mai inaugura fasilidade saúde Tumin, postu saúde ida importante ba populasaun sira iha aldeia tolu, Tumin, Quibiselo no Nonquikan iha suku Bobometo, ba futuru sei la susar ona tanba sei hetan atendimentu lalais no fasil iha tempu udan,” Prezidente Autoridade RAEOA, Arsénio Paixão Bano, ko’alia iha ámbitu inaugurasaun ne’e.
Iha biban ne’e, Arsénio Paixão Bano, apela ba profisionál saúde iha postu saúde Tumin, atu fó sai aviza ba komunidade kona-bá operasaun no funsionamentu ba atendimentu iha postu saúde foun ne’e.
Autoridade kontinua esforsu maka’as atu mellora fasilidade saúde iha fatin hotu-hotu, lori dezenvolvimentu besik populasaun sira bele asesu halo tratamentu ho distánsia besik.
“Ha’u husu de’it komunidade no autoridade lokál kuidadu ita-nia fasilidade ne’e ho di’ak, ita-nia polítika prioridade mós ba setór sáude no edukasaun tanba ne’e iha tinan ida ne’e, ita sei reforsa tán setór saúde iha Oé-Cusse, tanba tinan 2021 to’o 2022 RAEOA konstrui postu saúde lima iha fatin sira-ne’ebé do’ok hosi fasilidade saúde,” nia afirma.
Iha biban ne’e, reprezentante Jestor Oésilo, Mateus Colo, lori komunidade suku Bobometo agradese ba Autoridade RAEOA, tanba iha 2021 to’o 2022 sub-rejiaun Oésilo hetan fasilidade sufisiénte, hahú hosi sala izolamentu iha COVID-19 to’o konstrui tán postu saúde ba komunidade.
“Ha’u atu informa, katak fasilidade ne’e importante tebes atu fasilita di’ak liután populasaun iha baze iha situasaun mota boot hanesan ne’e, sira labele hakat mota mai to’o sentru saúde Oésilo sentru, tán ne’e ha’u reprezenta komunidade ami hato’o agradese ba autoridade nia apoiu ida-ne’e,” nia orgullu.
Ba Kompañia Fitun Naubabas Unip. Lda no kompañia Joana Bobo Tanu Unip.Lda ne’ebé entrega hodi bele utiliza fasilidade rua ne’e iha tempu badak nune’e populasaun bele asesu ba tratamentu.
Purtantu, konstrusaun postu saúde Tumin ezekuta hosi hosi kompañia lokál Fitun Naubabas Unipesoál Lda, ho valór orsamentu $66.555.33, durasaun servisu durante fulan-haat.
Nune’e mós konstrusaun ba rezidénsia médiku nian, ezekuta hosi kompañia Joana Bobo Tanu Unipesoál Lda ho valór orsamentu rihun $70, durasaun servisu fulan-haat, projetu unidade rua ne’e autoridade aloka osan hosi Orsamentu Jerál Estadu (OJE) 2022 nian.
Notísia relevante: https://tatoli.tl/2022/11/29/inaugura-projetu-saude-tolu-iha-oe-cusse-taur-husu-profisional-atende-povu-ho-diak/
Jornalista : Abílio Elo Nini
Editór : Evaristo Soares Martins
