Profesór kontratadu 71 iha Aileu sei elimina na’in-rua
DILI, 20 fevereiru 2023 (TATOLI)–Diretór Servisu Edukasaun Munisípiu Aileu, Carlito Pereira, hateten Dirasaun Servisu Edukasaun Munisípiu Aileu (DSEMA) husu ona ba Ministériu Edukasaun Juventude no Desportu atu elimina profesór kontratu na’in-rua hosi lista kontratadu.
Notísia Relevante: MEJD kontrata ona profesór voluntáriu 1.715 sai profesór kontratadu
Nia hatutan, lista profesór kontratadu na’in-rua ne’e ema na’i-ida (1) servisu ona iha Austrália no ida seluk sai ona mentór lokál iha eskola balun.
Profesór voluntária ninia dokumentu sira antes ne’e hetan ona selesaun hosi ekipa painél juri iha MEJD ne’e, iha profesór hamutuk 380 mak hatama dokumentu maibé depois anunsia rezultadu iha de’it na’in 71 mak pasa.
“Ha’u halo ona konfirmasaun iha profesór voluntáriu na’in-71 ne’ebé pasa ona ba profesór kontratadu ne’e iha profesór na’in-rua mak la’os ona profesór. Razaun katak sira na’in-rua ne’e ida servisu ona iha Austrália no ida seluk sai ona mentór lokál iha eskola EBC Maumeta Aileu. Tanba ne’e, tenke halo eliminasaun tanba sira la hanorin ona,” Carlito Pereira hateten ba Agência Tatoli iha Edifísiu MEJD, Vila Verde, segunda ne’e.
Nia haktuir, informasaun ne’ebé sira simu profesór na’in-rua ne’ebé pasa ona hosi selesaun dokumentu ba profesór kontratdu ne’e, na’in-ida agora iha ona Australia no nia foin ba iha semana kotuk ne’e, tanba ne’e nia tenke lakon ona diretu hanesan profesór kontratadu.
Depois profesór ida seluk fali antes ne’e liu ona hanesan mentór lokál maibé depois MEJD loke oportunidade hosi hatama dokumentu profesór voluntáriu, nia mós hatama hotu tanba ladún hetan atensaun di’ak iha prosesu selesaun dokumentu sira-ne’e, entaun ninia dokumentu mós selesionadu hotu.
Ho nune’e, iha dalan rua de’it ba kolega profesór ne’ebé sai ona mentór lokál ne’e hakarak kontinua hanesan profesór kontratadu tenke hili ida kontinua servisu hanesan mentór ka sai profesór kontratadu, atu nune’e bele hetan kontratu iha fatin ida.
Ne’eduni bainhira kuandu profesór na’in rua ne’e maka elimina tan iha Aileu hetan de’it profesór kontratadu hamutuk profesór na’in 69 mak sei hakat ba kontratu. Parese sei laiha substituisaun ba fatin rua ne’ebé sei mamuk no ba sira seluk sei hela ba tinan oin mak hetan fila-fali rekrutamentu.
Entretantu, profesór voluntáriu iha Munisípiu Aileu tuir informasaun hosi Diretór Carlito katak iha faze rua ida naran ne’ebé rejistu iha MEJD no ida mós naran la rejistu iha MEJD.
Ba sira naran la rejista ne’ebé Dirasaun Servisu Edukasaun Aileu rekolla iha 2020-2021 hamutuk 120, hafoin sira-ne’ebé naran rejista iha MEJD ne’ebé dirasaun rekolla hotu hamutuk 260 ho nune’e totál profesór voluntáriu hamutuk 380 pesoa.
Jornalista : Tomé Amado
Editór : Cancio Ximenes
