MNEK-KFP fó pose ba funsionáriu foun na’in-tolu
DILI, 21 fevereiru 2023 (TATOLI) – Ministériu Negósiu Estranjeiru no Kooperasaun (MNEK) hamutuk ho Komisaun Funsaun Públika (KFP) fó posse ba funsionáriu foun na’in-tolu iha MNEK.
Funsionáriu foun hirak ne’e mak Olivio Paulo de Deus, pozisaun hanesan tékniku superiór grau B, Afief Umar Sultani, tékniku profisionál grau C no António Maria Auxiliadora Francisco Guterres, tékniku profisionál grau C.
Iha pose ne’e, MNEK Adaljiza Albertina Xavier Reis Magno hateten, sente orgullu ba funsionáriu foun na’in-tolu ne’e tanba durante ne’e ema hamutuk rihun ida resin mak aplika ba vaga ne’ebé MNEK loke maibé na’in-tolu de’it mak bele liu.
“Sira na’in tolu ne’e familiár ona ho MNEK, ha’u koñese di’ak sira na’in-tolu, sira ne’e servisu antes ona iha MNEK maibé sira hakarak los atu sai hanesan funsionáriu públiku, entaun MNEK loke vaga no sira konkorre ikus sira liu duni”, ministra dehan iha nia intervensaun bainhira fó pose iha salaun Nobre MNEK, ohin.
Nia dehan, Timor-Leste tama ona ba membru ASEAN hanesan observadór, presiza funsionáriu barak tan, ho nune’e funsionáriu tolu ne’e simu ona pose bele koloka sira iha area pertinente balu hodi apoiu servisu iha MNEK ba ASEAN.
“Iha tinan kotuk, ita loke vaga ba funsionáriu hamutuk 52 maibé so na’in-tolu de’it mak priénse rekezitu mak ohin simu ona pose ne’e, seluk aplika duni maibé la konsege priénse rekezitu, entaun iha fulan marsu nia-laran ita sei reanunsia fila fali vaga ba ema hamutuk na’in 49 atu sai hanesan funsionáriu públiku iha MNEK atu koloka ba servisu sira iha ASEAN no seluktan”, nia dehan.
Iha okaziaun ne’e ,reprezentante Prezidente KFP, Komisáriu Fausto Freitas da Silva, afirma liuhosi pose ne’ebé iha sai ona hanesan servidór públiku Estadu nian atu servi povu no nasaun.
“Imi na’in-tolu liuhosi prosesu naruk mak lori to’o faze ida, hahú ohin imi sai ona hanesan servidór públiku, hodi servi povu no nasaun tuir kompromisu no onra ne’ebé emposadu sira jura atu tane aas intrese públiku”, komisáriu realsa.
Nia apela ba emposadu na’in-tolu atu hala’o servisu ho profisionál tane aas prinsípiu no valór administrasaun públika nian hodi kumpre dever hotu ne’ebé konsagra ona iha Estatuta KFP nian hodi halao servisu ho imparsiál.
Rekorda fali katak funsionáriu Olivio Paulo de Deus antes ne’e servisu hanesan asesór iha MNEK ne’ebé apoiu iha Sekretariu Jerál nia fatin, Afief Umar Sultan hanesan nomeasaun polítika iha MNEK durante tinan hitu iha gabinete MNEK nian no António Maria Auxiliadora Francisco Guterres hanesan estajiadu iha MNEK.
Tuir dadus ne’ebé iha, totál funsionáriu servisu iha MNEK hamutuk 200-resin.
Prosesu rekrutamentu antes ne’e;
Molok hala’o rekrutamentu komisaun hosi MNEK define uluk termu referénsia no servisu hamutuk ho KFP hodi realiza prosesu hotu.
Prosesu rekrutamentu hahú iha tinan 2021 ema hamutuk na’in 1013 mak sai hanesan kandidatu ba totál vaga hamutuk 52 maibé la konsege to’o iha alvu no ema na’in-tolu de’it mak priénse kritéria.
Ho nune’e, iha fulan marsu mai, MNEK sei realiza hikas reanunsiu rekrutamentu atu kompleta vaga hamutuk 52 ne’e.
Bainhira halo reanunsia MNEK sei halo mudansa iha kritéria balun atu nune’e bele hetan kandidatu ne’ebé barak, mudansa ba kritéria prinsipál mak hanesan (International English Language Testing System) IELTS antes ne’e kandidatura sira tenke hetan mínimu 5 másimu 6.
Ho kriteria ne’ebé todan ho nune’e IELTS ba reanunsia ne’e sei altera ba 4,5 atu bele hetan kandidatura ne’ebé barak.
MNEK husu ba públiku hotu ne’ebé iha kapasidade ba lian inglés no portugés bele ba aplika vaga ne’ebé sei reanunsia iha marsu mai ne’e.
Vaga ne’e loke, MNEK servisu hamutuk ho KFP ho nune’e se mak liu simu kedan pose hanesan funsionáriu públiku ne’ebé sei servisu iha MNEK hanesan diplomata no funsionáriu permanente.
Jornalista:Hortencio Sanchez
Editór : Zezito Silva
