ADN la atraza pagamentu ba empreza konstrui projetu kapitál dezenvolvimentu
DILI, 21 fevereiru 2023 (TATOLI)—Diretór Ezekutivu Ajénsia Dezenvolvimentu Nasionál, Institutu Públiku (ADN), Mariano Renato Monteiro da Cruz, konsidera informasaun ne’ebé hato’o hosi DNDPE-MEJD katak konstrusaun projetu kapitál dezenvolvimentu tolu iha Dili, Liquiça no Atabae sai paradu ne’e tanba ADN mak atraza prosesu verifikasaun pagamentu ne’e la loos.
Notísia Relevante: DNDPE konsidera ADN mak difikulta konstrusaun projetu kapitál dezenvolvimentu
“Ha’u hakarak dehan dadus kona-ba konstrusaun projetu tolu ne’ebé paradu ne’e, bele konsidera projetu Atabae foin mak atinje 30%. Konstrusaun ba eskola Liquiça foin mak atinje 40% no konstrusaun Hera nian mós foin mak atinje 28%. AND la atraza prosesu pagamentu hosi MEJD ba empreza konstrui projetu kapitál dezenvolvimentu,” Mariano Renato ba Agência Tatoli iha ninia servisu fatin, Fatuhada-Hudi Laran, tersa ne’e.
Nia dehan, tanbasá mak DNDPE-MEJD dehan fali ADN mak atraza prosesu verifikasaun ne’e, hosi prosesu levantamentu de dadus projetu Atabae nian antes ne’e kompañia sira submete ona pedidu ba Ministériu Edukasaun iha loron 14 de novembru 2022, maibé Ministériu Edukasaun haruka fali pedidu levantamentu pagamentu mai ADN ne’e iha loron 06 de dezembru 2022.
“Ha’u harak dehan sira mak halo demora prosesu verifikasaun ne’e kuaze loron 22 nia laran. Ami-nia prosesu verifikasaun la liu loron 15. Ami halo verifikasaun iha de’it loron ualu nia laran,” nia dehan.
Kona-ba projetu Liquiça, nia hateten, kompañia sira hatama karta pedidu pagamentu hodi husu prosesu verifikasaun ba sira iha loron 28 jullu 2022 maibé sira manda fila-fali pedidu ne’e mai ADN iha loron 15 de Agostu 2022, kerdizér sira demora pedidu pagamentu iha sira-nia fatin durante loron 18 nia laran.
“Karta ne’ebé sira dirije mai ami iha loron 15 agostu 2022 maibé ha’u simu iha dia 16 agostu 2022, ami halo verifikasaun durante loron 15 tuir durasaun tempu ne’ebé ami hetan. Depois verifikasaun ramata ami haruka fila-fali kedan rezultadu verifikasaun ba sira atu halo prosesa,” noa dehan.
Enkuantu projetu iha eskola Hera mós kompañia haruka pedidu verifikasaun ba sira iha 14 novembru 2022, sira halo demora durante loron 22 nia laran hafoin sira dirije pedidu mai ADN iha loron 15 dezembru 2022, maibé ADN simu iha loron 16 dezembru 2022 no prosesu verifikasaun ne’ebé ADN halo iha loron ualu de’it.
Ne’ebé DNDPE-MEJD dehan ADN mak difikulta prosesu pagamentu ne’e bele aprezenta to’o dadus mai ami depois ho ninia razaun sira. Hanesan Dirijente ADN hakarak dehan dala ruma parte tékniku sira bosok tan diretór ho informasaun falsu depois diretór nia mós la halo verifikasaun ho didi’ak fiar de’it ona informasaun sira ne’e maka ikus mai buat hotu la’o sala dalan.
Maibé, antes ne’e ambiente servisu entre DNDPE-MEJD ho ADN iha ona difikuldade no fallansu relasiona ho estatutu sira. matadalan ne’ebé sira kria la involve ADN maibé depois aprova no publika tiha mak sira obriga ADN atu halo verifikasaun, ne’e la’ós tuir lei ne’ebé vigora antes ne’e halo ona verifikasaun tanba buat hotu implementa ona ne’ebé lei la fó dalan.
“Sira kria matadalan la konsulta ho ami maibé tama ona ba pagamentu mak foin envolve ami antes ne’e ha’u dehan ba sira di’akliu lalika envolve ami iha prosesu pagamentu. Ami la kestiona, laiha problema maibé sira lakohi dehan ADN tenke envolve,” nia hateten.
Maibé envolvimentu ADN nian tenke kumpre regra sira, tanba tuir estatutu ADN nian verifikasaun dokumentu ne’ebé seidauk implementa.
Bainhira implementa tiha mak foin ba halo verifikasaun, ida-ne’e mak mosu problema hanesan agora ne’e, tuir nia, buat hotu regula ona iha sistema no ema hotu hakarak projetu ida tenke iha kualidade maibé kualidade ne’e sei la monu hosi lalehan mai.
Kualidade ne’e ezije ema hotu atu servisu ho loloos, sistema servisu tenke loos, formatu servisu tenke loos no supervizaun tenke iha mak foin bele garante kualidade ba projetu sira-ne’e, maibé buat sira ne’e laiha sei la vale buat ida.
Jornalista : Tomé Amado
Editór : Cancio Ximenes
