Hasan Ramos salva Assalam ho golu úniku
DILI, 21 fevereiru 2023 (TATOLI) – Avansadu Assalam FC Hasan Ramos (7) susesu iha nia estratejia brillante hodi marka golu úniku ba rede Emmanuel FC 1-0 salva nia klube hosi lakon.
Vitoria ne’ebé Ramos fó ba Assalam ne’e iha jornada primeiru Liga Futeból Timor-Leste (LFTL) ne’ebé hala’o iha Estádiu Munisipál Dili, tersa loraik ne’e.
Bainhira menutu primeiru, ekipa rua hahú lansa kedan kontra no atake ba malu tuir tekniku no abilidade pesoál ninian atu buka hatama golu hodi bele fó vitória ba sira nia ekipa.
Luta naruk ne’ebé ekipa rua halo iha kampu laran la fó rezultadu di’ak tanba ekipa rua iha forsa ne’ebé la diferente.
Tempu la’o nafatin ba oin, jogu komesa manas liután tanba avansadu Emmanuel Edit Savio (10) ameasa makas rede Assalam nian maibé suta hirak ne’ebé Edit realiza nunka kona alvu.
La’os Emmanuel de’it mak halo kontra no atake makas maibé assalam mós lansa kontra no atake ne’ebé sériu maibé defeza Emanuel nian tenta hasai tutuir bola ba liur no halo falla liután jogu Assalam nian.
Tanba forsa ne’ebé hanesan to’o menutu 45 iha primeira parte termina ekipa rua laiha ida mak prodúz golu ho nune’e tenke emapata 0-0.
Dolar ba segunda parte ekipa rua nafatin lansa kontra no atake makas liután kompara ho primeira parte.
Edit Savio mantein nia pozisaun hanesan primeira parte maibé nunka sobu defeza Assalam nian ho nune’e Emmanuel nia jogu falla totál la marka golu to menutu termina.
Enkuantu iha Assalam kontinua esforsu ne’ebé makas atu buka golu hodi bele save metin pontu tolu, esforsu hirak Assalam halo la hela de’it hanesan esforsu tanba iha menutu 73 Husen Ramos hetan oportunidade di’ak liuhosi nia kolega Daniel Appiah (11) lansa suta bola aas Ramos simu kedan utiliza nia ulun hatama kedan bola ba rede Emmanuel no guarda rede Fortonato Gomes (77) la konsege salva muda rezultadu ba 1-0.
Hosi golu mesak ne’ebé Ramos lansa fó kedan vitória ba Assalam hodi rekolla pontu tolu iha tabela klasifikasaun provizóriu tanba to’o menutu 90 termina laiha tan golu ruma mak akontese.
Eskuad Assalam:
Nathaniel Agbozo (30), Bonarudin Amin (17), Husen Costa (27), Jovanio Braz (8), Hermenio de Sousa (14), Lourenco Freitas (19), Francisco da Costa (28), Anizio Boavida (16), Daniel Appiah (11), Adikha Godwin (13), Amir Hamzah (23).
Suplente:
Junildo Pereira (1), Hasan Costa Ramos (7), Martinho Belo (33), Elias Mesquita (10), José Soares (5), Emidio Braz (4), Tirjon Maia (15), Celcio Pereira (88), Alexandrino Miranda (26) no Alexandre Weber.
Treinadór: Gaspar Amaral
Eskuad Emmanuel:
Fortonato Gomes (77), Afonso de Carvalho (2), Alexandre Moreira (9), Amancio Araujo (18), Cristovão de Carvalho (29), Edit Savio (10), Jonatas Pereira (7), João de Sousa (22), Juvito Moniz (3), Sandro Quintão (14), Zinedine Lopes (6).
Suplente:
Carvarinho Fernandes (1), Carlos Soares (23), Elroy Braz (15), Zeferino Alves (12), Luis Gusmão (17), Mario Quintão (11), Nilton de Carvalho (25), Orlando Belo (21), Vivando Magno (13), Angelito Tilman (8) no Bernardino de Sana (4).
Treainadór: Emilio da Silva
Jogu ne’e dirije hosi árbitru Eufrasio da Costa, juiz da liña Filomeno da Silva, Henrique Pereira no árbitru rezerva Romario Tety.
Jornalista:Hortencio Sacehez
Editór : Zezito Silva
