KFP husu FP atu separa kestaun polítika no servisu profisionál
DILI, 21 fevereiru 2023 (TATOLI) – Komisáriu Funsaun Públika (KFP) Fausto Freitas da Silva, alerta ba funsionáriu públiku (FP) hotu iha territóriu nasionál atu separa kestaun polítika no servisu profisionál atu labele kahur sasan.
“KFP alerta ba funsionáriu públiku hotu iha Timor-Leste laran tomak, tinan ida ne’e, tinan polítika nian, la kleur tan ita hakat ba eleisaun parlamentár, ne’e duni husu ba funsionáriu públiku hotu atu separa kestaun polítika no kestaun profisionál tanba Konstituisaun Repúblika Demokratika Timor-Leste (KRDTL) garante sidadaun hotu hosi idade 17 ba leten iha direitu partisipa iha vida polítika, funsionáriu públiku sira mós sidadaun maibé iha direitu tenke halo separasaun, kestaun partidarizmu no servisu profisionál nian”, komisáriu dehan ba jornalista sira iha edifísiu MNEK, ohin.
Nia esplika, funsionáriu públiku labele viola dever sira iha Estatuta KFP nian, mak husu ba funsionáriu públiku sira ne’ebé atu partisipa iha atividade kampaña eleitorál tenke husu lisensa antes hodi partisipa iha kampaña eleitorál sira.
“Funsionáriu públiku sira atu partisipa iha kampña eleitorál ho partidu polítiku balun tenke husu uluk lisensa rejime espesiál antes atu partisipa”, nia afirma.
Tuir dadus hosi KFP nian katak funsionáriu públiku ativu daudaun ne’e hamutuk 3,465.
Jornalista:Hortencio Sanchez
Editór : Zezito Silva
