SEJD garante atleta sira sei hatudu prestasaun di’ak iha Sea Games
DILI, 23 fevereiru 2023 (TATOLI) – Sekretáriu Estadu Juventude no Desportu (SEJD) Abrão Saldanha, garante sei hatudu prestasaun di’ak iha SEA Games tinan ne’e iha Kamboja, hodi lori fali medalla osan mean mai Timor-Leste.
“Ita iha esperansa katak SEA Games tinan ne’e, ita nia atleta sira sei hatudu prestasaun di’ak hodi lori fali medalla osan mean mai Timor-Leste, ha’u optimista ida ne’e”, Abrão dehan ba Agência TATOLI iha Farol, ohin.
Nia dehan, SEJD servisu hamutuk hela ho Konfederasaun Desportiva Timor-Leste (CDTL-sigla portugés) no Komite Olímpiku Timor-Leste (CONTL-sigla portugés) atu haree ba kondisaun atleta sira nian no treinamentu ba atleta sira.
Iha faze preparasaun nian, SEJD apoiu orsamentu hamutuk rihun $ 82 ba modalidade hitu ne’ebé konfirmadu atu kompete iha SEA Games tinan ne’e iha Kamboja.
Modalidade hitu ne’e mak hanesan, atletizmu, taekwondo, boxe, futeból, siklizmu, voleiból praia no Karate-do.
Governante ne’e informa, tuir relatóriu ne’ebé iha, atleta sira hala’o treinamentu iha ida-idak nia fatin, maibé tempu besik sei konsentra hamutuk iha fatin ida hanesan kuartél Polísia Militár (PM) Quintal Boot, antes aranka ba Kamboja.
Jornalista:Hortencio Sacehez
Editór : Zezito Silva
