Ermera seidauk rejistu kazu dengue iha janeiru-fevereiru
DILI, 24 fevereiru 2023 (TATOLI) – Diretór Servisu Saúde Munisípiu Ermera Joni Alves dos Santos, dehan janeiru to’o fevereiru, Munisípiu Ermera seidauk rejsitu kazu dengue tanba ho esforsu ekipa saúde nian rezulta preventiva direta iha komunidade sira.
“Ami seidauk rejistu kazu dengue tanba ekipa ida kona-ba prevensaun dengue nian la’o makas los no halo edukasaun promosaun saúde ba komunidade sira iha bairu, depois distribui aimoruk abate, depois halo mós fomigasaun ba área sira ne’ebé mak identifika ona tinan-tinan iha kazu dengue, liuliu fatin sira hanesan Railaku, Gleno Vila, entaun fatin ne’e ita tau atensaun los ba área sira ne’ebé mak uluk fatin risku ba moras dengue”, Joni Alves dos Santos, informa iha Salaun Mauhoka, ohin.
Nia informa, fahe aimoruk abate ida ne’e, kada fulan tolu, tanba ne’e mak kuandu udan monu rai mós laiha kazu dengue.
Diretór Servisu Saúde Munisípiu Manatuto (SSMM), Mateus Vicente Correia, informa Manatutu agora provizoriamente kazu dengue laiha.
“Ami kompara ho tinan lima ba kotuk, ami ho Munisípiu Dili hadau malu ho dengue, maibé depois ami konsege aloka ami nia ekipa sira antes udan monu rai tenke prevene ona, fahe abate, depois bainhira afeta dengue entaun ami-nia ekipa halo kedas fomigasaun, maibé husi janeiru to’o mai ohin loron kazu dengue laiha”, nia esplika.
Nia relata kona-ba estoke abate ho fomigasaun sufisiente iha SSMM tanba husi Departamentu Saúde Ambientál MS sempre distribui estoke aimoruk dengue ida ne’e.
Jornalista : Felicidade Ximenes
Editór : Zezito Silva
