MAP inaugura armazein Sentru Lojístika Nasionál iha Maliana
BOBONARO, 27 fevereiru 2023 (TATOLI) – Ministru Agrikultura no Peska (MAP), Pedro dos Reis, hamutuk ho Embaixadór Japaun iha Timor-Leste, Kimura Tetsuya, segunda ne’e halo inaugurasaun ba armazein Sentru Lojístika Nasionál (CLN, sigla portugés) ne’ebé lokaliza iha suku Holsa, postu administrativu Maliana, munisípiu Bobonaro ne’ebé kontrui hosi Japan International Cooperation Agency (JICA).
Enkuantu armazein ne’e mós hetan kedas bensaun hosi Padre Parókia Santa Cruz. Maliana, Pe. Valerio Gusmão.
Notísia relevante: CLN sensibiliza presu produtu lokál ba grupu agrikultór Maliana
Ministru Agrikultura no Peska, Pedro dos Reis, agradese ba governu Japaun ne’ebé mak apoia ona Timor-Leste hodi harii armazein ne’e inklui projetu sira seluk hanesan irrigasaun, ponte, bee-moos no seluk tán.
“Ohin, iha Maliana halo tán armazein ida, entaun tulun ita-nia komunidade sira atu nune’e ministériu hala’o nia kna’ar hodi hasa’e produsaun, maibé molok to’o iha merkadu pelumenus iha fatin ne’ebé hodi asegura,” nia hataten iha dirkursu.
Ministru Pedro parabeniza CLN ne’ebé kontinua koopera ho JICA hodi kontrui ona armazein boot tolu iha Timor-Leste ne’ebé lokaliza iha munisípiu Baucau, Natarbora iha munisípiu Manatutu no ida iha Maliana.
“Espera katak ba futuru prezidente CLN bele halo tán aproximasaun ho ita-nia pareseiru sira,” nia katak.
Reprezentante JICA iha Timor-leste, Ito Mimpei, hateten Maliana hanesan rejiaun ida-ne’ebé furak tebes, liuliu iha produsaun tanba natar sira-ne’e hanesan moos iha Japaun.
Nia dehan, konstrusaun armazein Maliana no reabilitasaun armazein Bebora, Dili, hetan apoia másimu hosi JICA ne’ebé mak sai hanesan komponente ida atu reforsa governu Timor-Leste nia sistema jestaun armazeinamentu no sistema foos rai liuhosi foos rai hosi CLN, JICA no MAP
“Bainhira liaha sistema armazeinamentu ne’ebé mak di’ak, entaun agrikultór sira-nia esforsu tomak ba iha produsaun ne’e saugati de’it,” nia katak.
Embaixadór Japaun iha Timor-Leste, Kimura Tetsuya, fiar katak ho renovasaun armazein CLN nian hirak-ne’e, sei hadi’ak kolesaun armazeinmentu no distribuisaun foos lokál, ikus mai bele kontribui ba realizasaun distribuisaun foos lokál.
“Ha’u hein katak armazein hirak-ne’e sei kontribui ba reforsa indústria agríkola atraves melloramentu produsaun foos lokál no loke dalan hodi diversifika liután indústria no ekonomia sustentável ba Timor-Leste,” diplomata ne’e dehan.
Prezidente CLN, Jervazio Cardoso de Jesus Silva, husu ba autoridade no komunidade sira iha Maliana atu kuida armazein ne’e atubele asegura kualidade produtu sira iha laran.
“Tau matan ba armazein ne’e ita hotu nian, povu Timor-Leste nia kabun hotu iha-ne’e, tanba saida mak iha armazein, tanba fatin ida seguru no hahaan sira ita tau iha laran ne’e, bele iha durasaun, sé tau de’it iha ita-nia uma la kleur dodok ona,” nia dehan.
Nia fó-sai katak, daudaun ne’e CLN iha armazein boot hamutuk lima, ida iha Maliana, Bebora (Dili) Tibar, Bauacau no Natarbora, ne’ebé mak hetan apoia hosi governu Xina ho sistema modernu.
Notísia relevante: CLN sei iha estoke foos 350.000 tonelada
Jornalista: Sérgio da Cruz
Editór: Evaristo Soares Martins
