PAM-Xina disponibilza ai-han super sereál tonelada 64 ba SAMES
DIL, 27 fevereiru 2023 (TATOLI) – Programa Ai-han Mundiál (PAM) ho Reprezentante Embaixadór Xina iha Timor-Leste entrega ai-han super sereál hamutuk tonelada 64 ba Servisu Autónomu Medikamentu Ekipamentu Saúde (SAMES) hodi apoia ba inan isin rua no inan fó susu iha Munisípiu Bobonaro, Aileu no Manufahi.
“Ami apoiu super sereál ida ne’e atu haree ba númeru má nutrisaun iha munisípiu tolu. Bainhira ida ne’e di’ak ona, ami sei apoiu tan ba munisípiu hotu iha territóriu nasionál, tanba ita haree problema má nutrisaun sei aas iha Timor-Leste”, Reprezentante Programa Ai-han Mundiál (PAM) iha Timor-Leste, Cecilia Garzon, informa bainhira entrega super sereál ba SAMES iha kampu Alor, ohin.
Nia dehan, Iha 75% populasaun Timor -Leste laiha kapasidade atu asesu ai-han nutritivu tuir estudu ne’ebé mak WFP halo antes covid-19, bainhira WFP halo foun fali estudu ida ne’e hatudu katak situasaun ida ne’e sai nafatin problema ba má nutrisaun.
“Super sereál ida ne’e ba inan isin rua no mós inan fó susu sira ne’ebé mak sai nafatin problema ba má nutrisaun. Durante ne’e ita enfrenta iha situasaun pandemia covid-19 halo nível uma-kain sira hetan susar tanba la iha kapasidade atu kompra ai-han nutritive, entaun ho ida ne’e, WFP nafatin apoia ba SAMES hodi apoia ba inan isin rua no inan fó susu sira atu bele hadia sira nia nutrisaun ba futuru nian”, nia esplika.
Nia dehan, WFP nafatin rekomeda ba Governu Xina hodi kontinua fó apoiu ai-han ida ne’e ba inan isin rua no inan fó susu sira inklui ba labarik sira ne’ebé mak nutrisaun la di’ak atu bele hetan ai-han nutritivu ida ne’e.
Konselleiru Ekonomia Embaixada Xina iha Timor-Leste, Geng Weixia, dehan importante tebes entrega ai-han nutritivu ida ne’e ba Governu Timor-Leste liuhosi SAMES atu apoiu ba inan fó susu no inan isin rua sira ne’ebé mak ho problema má ntrisaun iha Timor-Leste.
“Ita iha problema duni ba má nutrisaun iha Timor-Leste liuliu ba inan fó susu no inan isin rua sira tanba ne’e mak Governu Xina apoia ba SAMES atu haree ba má nutrisaun ida ne’e”, Geng Weixia afirma.
Diretór Ezekutivu SAMES Santana Martins, agradese ba reprezentante WFP iha Timor-Leste no mós reprezentante Emabaixada Xina iha Timor-Leste ne’ebé mak apoiu SAMES ho ai-han super sereál ba inan isin rua no mós inan fó susu ne’ebé mak ho má nutrisaun sira iha munisípiu tolu.
“Ami agardese tebes ba WFP nafatin iha ami nia sorin hodi apoiu no mós Governu Xina nafatin ho komprometidu ho ami durante iha situasaun difisíl iha situasaun Covid-19”, nia konklui.
Jornalista : Felicidade Ximenes
Editór : Zezito Silva
