MS ezekuta millaun lima husi UE ba programa nutrisaun iha TL
DILI, 28 fevereiru 2023(TATOLI) – Diretór Nasionál Saúde Públika iha Ministériu Saúde Frederico Bosco, dehan ministériu ezekuta ona orsamentu millaun lima ne’ebé apoiu husi Uniaun Europeia (UE) ho totál millaun 15 ba programa nutrisaun iha Timor Leste.
“Durante ne’e Uniaun Europeia apoiu orsamentu hamutuk millaun $15 ba tinan lima nian maibé MS ezekuta de’it orsamentu millaun lima ba programa nutrisaun nian”, Frederico Bosco dehan bainhira halo dialógu no avaliasaun ba programa nutrisaun entre parseiru internasionál no Governu iha sala reuniaun diplomata IED MNEK, ohin.
Nia dehan, orsamentu ne’ebé mak apoiu husi UE ne’e aloka ba Governu Timor-Leste atu uza ba programa sira ne’ebé mak prioridade haat.
“Orsamentu ida ne’e ita ezekuta ba programa haat iha MS mak kombate má nutrisaun, distribuisaun ai-han suplementu nutritivu, distribuisaun vitamina no mós folic acid ba inan isin rua sira maibé iha programa ne’e MS la atinje alvu ne’ebé mak hanesan falta dadus no mós difikuldade hodi akumula dadus hotu”, nia dehan.
Iha fatin hanesan, Emabaixadór UE iha Timor-Leste, Marc Friederich rekoñese atu kombate má nutrisaun presiza servisu hamutuk hodi redúz problema nutrisaun iha TL.
“Importante mak ami hatene rezultadu kombate má nutrisaun iha Timor-Leste katak sei iha problema maibé programa ida ne’e ami kontinua apoiu nafatin hodi melhora no servisu hamutuk ba futuru”, Marc Friederich afirma.
Emabaixadór UE sujere ba Governu atu avalia di’ak no define asaun sira atu bele halakon má nutrisaun iha Timor-Leste.
“Atu kombate má nutrisaun prezisa envolvimentu no koordenasaun husi liña ministeriál sira hodi kombate má nutrisaun ida ne’e iha TL”, nia subliña.
Vise Ministru Saúde Bonifacio Muacoli dos Reis, rekoñese programa má nutrisaun iha Timor Leste seidauk atinje alvu sira.
“Ita hatene katak ita seidauk atinje alvu sira maibé ita nafatin halo servisu hodi identifika ema ho má nutrisaun liuhosi atividade saúde na família, entaun ita bele fó atendimentu ba sira”, Maucoli konklui.
Jornalista : Felicidade Ximenes
Editór : Zezito Silva
