DILI, 28 fevereiru 2023 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Bano, husu ba Ministériu Finansa (MF) atu halo revizaun ba Dekreu-Lei n.u 22/2022, loron 11 maiu kona-ba Rejime Jurídiku Aprovizionamentu no Kontratu Públiku.
“Informa ba Primeiru-Ministru katak presiza halo revizaun ba dekretu-lei aprovizionamentu hodi fasilita ezekusaun orsamentu RAEOA nian ho di’ak liután”, Arsénio Bano hatete hafoin hasoru malu ho Xefe Governu, iha Palásiu Governu.
Ezekusaun orsamentu RAEOA nian, to’o iha 24 fevereiru, besik millaun $1 hosi orsamentu alokadu hamutuk millaun $84.
“Foin iha trimestre dahuluk, tanba ne’e maka ami husu revizaun ba dekretu-lei aprovizionamentu rejime espesiál ninian para fasilita ami halo ezekusaun ne’e di’ak liu. Razaun halo revizaun ba dekretu-lei hodi fasilita RAEOA nia ezekusaun lapersiza mai to’o Governu sentrál liga ho projetu infraestrutura sira”, nia salienta.
Autoridade rejiaun ne’e adianta, iha marsu, sei halo aprovizionamentu ba projetu eskola besik 25, reabilitasaun eskola besik 15 no sistema distribuisaun bee-moos.
Rekorde katak, iha 19 maiu 2022, eis-Prezidente Repúblika, Francisco Guterres ‘Lú Olo’ promulga Dekretu-Lei n.u 22/2022, loron 11 maiu kona-ba Rejime Jurídiku Aprovizionamentu, Kontratu Públiku no ninia infrasaun.
Dekretu-lei ne’e simplifika prosedimentu aprovizionamentu hosi tipu prosedimentu hitu ba tolu de’it, hanesan mellora sistematizasaun no deskrisaun detalla hosi kada faze aprovizionamentu, promove transparénsia ho esforsu hosi portal aprovizionamentu, reforsu prosesu planeamentu no reforsu atribuisaun sira komisaun nasionál aprovizionamentu.
Dekretu-lei ne’e troka rejime jurídiku tolu ne’ebé aprova iha 2005 no iha ona vijénsia durante tinan 17 nia laran, hanesan rejime jurídiku aprovizionamentu, rejime jurídiku kontratu públiku no infrasaun administrativa sira.
Diploma foun ne’e integra rejime jurídiku atuál tolu ba iha úniku rejime jurídiku ida de’it no diploma ne’e entra ein vigór iha 01 janeiru 2023 hodi fó biban ba funsionáriu sira hosi departamentu governamentál atu tuir sesaun traballu ka formasaun molok implementa.
Dekretu-lei ne’e hanesan diploma importante ida hosi diploma neen ne’ebé Governu prepara hodi apoiu implementasaun Lei Enkuadramentu Orsamentál-Lei Estruturante ida-ne’ebé mak eis-Prezidente Repúblika, Francisco Guterres ‘Lú Olo’ promulga ona iha 09 fevereiru 2022.
Dekretu-lei ne’e aliña ho programa Governu, liuliu iha reforma jestaun finansa públika liuhusi diversifikasaun finanseira iha área reseita no despeza, mellora sistema aprovizionamentu, fortalese desentralizasaun finanseira no orsamentu ho baze ba programa.
Notísia relevante : https://tatoli.tl/2022/05/19/pr-promulga-dekretu-lei-rejime-juridiku-aprovizionamentu-no-kontratu-publiku/
Jornalista: Antónia Gusmão
Editora: Maria Auxiliadora
