PNTL rejista membru 38 sofre moras estroke

DILI, 02 marsu 2023 (TATOLI) – Portvós Komandu Jerál Polísia Nasionál Timor-Leste (PNTL), Superintendente Xefe Arnaldo Araujo, dehan komandu rejista membru na’in-38 mak sofre moras estroke.
“Durante ne’e Komandu PNTL rejista membru 70 mak sofre moras, hosi ema nain 70 ne’e balun sofre moras asma (is bo’ot), TBC no moras fuan. Maibé iha ema 38 mak sofre moras estroke”, Superintendente Xefe Arnaldo Araujo, hateten ba jornalista sira iha Komandu Jerál PNTL, Caicoli, kinta ne’e.
Nia dehan, hosi membru PNTL 38 rejista moras stroke. Ida ne’e númeru makas liu, hirak ne’e mai hosi membru sira ne’ebé halo kna’ar Dili iha Unidade Espesiál Polísia no Unidade Polísia Marítima (UPM).
Komandu Jerál PNTL mós rejista membru sira ne’ebé sofre moras estroke hanesan iha Munisípiu Ermera, iha na’in-tolu, Bobonaro iha na’in-haat no iha Covalima na’in-ida.
“Agora daudaun komandu jerál liuhosi departamentu klínika PNTL, mediku sira, enfermeiru sira halo hela vizita ba membru PNTL ne’ebé mak sofre estroke, moras tensauun no moras fuan. Iha vizita ne’e ho objetivu hodi haree sira-nia kondisaun atu fó tratamentu ba sira”, nia refere.
Komandante ne’e dehan, ai-moruk iha klínika PNTL ne’e sufisiente, atu halo tratamentu ba membru sira ne’ebé moras.
“Maske iha klínika PNTL ai-moruk hanesan tentasaun no moras fuan mak laiha, maibé komandu jerál ba oin sei halo planu hodi hola tan ai-moruk atu bele atende ba ita-nia membru ka família PNTL ne’ebé mak presiza duni bele halo tratamentu”, nia dehan.
Iha biban ne’e, nia husu ba membru PNTL sira atu tau atensaun ba saúde liuhosi kontrola hahan sira no deskansa di’ak.
“Tanba institusaun PNTL presiza ita-nia kontrubisaun iha tempu sira hanesan eleisaun parlamentár 2023 hodi membru hotuhotu fó seguransa ba tempu eleisaun nian”, nia konklui.
Jornalista: Natalino Costa
Editór : Zezito Silva

