iklan

NASIONÁL, EDUKASAUN, DILI, HEADLINE

DSEMD identifika profesór voluntáriu 48 ho nivel akadémiku ensinu sekundáriu

DSEMD identifika profesór voluntáriu 48 ho nivel akadémiku ensinu sekundáriu

Profesór voluntáriu sira iha Munisípiu Dili, haree naran iha kuadru avizu Diresaun Servisu Edukasaun Munisipiu Dili, iha Comoro, tersa-feira (23/08). Imajen Tatoli/ Isaura Lemos.

DILI, 02 marsu 2023 (TATOLI)–Dirasaun Servisu Edukasaun Munisípiu Dili (DSEMD) identifika iha profesór voluntáriu hamutuk na’in-48 ne’ebé hanorin estudante sira iha nivél ensinu báziku no ensinu sekundáriu sei uza diploma ensinu sekundáriu.

Notísia Relevante: AMN-TL hato’o preokupasaun profesór voluntáriu ba PPN

Diretór Servisu Edukasaun Munisípiu Dili, Carlito da Silva, hateten profesór na’in-48 ne’ebé identifika hanorin ho diploma ensinu sekundáriu ne’e hetan ona xamada atensaun katak mezmu sira bele hanorin kle’ur ona maibé kuandu identifika pasa iha selesaun dokumentu ba profesór kontratadu sei kansela sira-nia estatutu.

“Ami halo identifikasaun ne’e bazeia ba prosesu reklamasaun ne’ebé ita-nia Ministériu Edukasaun loke ba reklamante sira durante loron 15 nia laran. Tanba ne’e, ita-nia ekipa inspesaun sira halo ona verifikasaun konsege identifika ona iha profesór hamutuk na’in-48 mak hanorin hela iha eskola sira ho diploma ensinu sekundáriu,” diretór ne’e hateten ba Agência Tatoli iha ninia servisu Fatin edukasaun Comoro, kinta ne’e.

Nia dehan, profesór sira-ne’e hanorin iha ensinu báziku no ensinu sekundáriu loloos labele tanba kritériu ka regulamentu Ministériu Edukasaun nian hateten profesór ida atu hanorin iha eskola pieomenus tenke iha nivel baixarelatu ka lisensiatura, maibé la hatene profesór sira-ne’e tanba saida mak bele tama iha prosesu nia laran.

Tuir nia, profesór sira-ne’e la tama iha kritériu mezmu sira hanorin kle’ur ona tanba ne’e nia husu ona ba INFORDEPE atu prepara turma rua hodi koloka profesór 48 pesoa ne’e iha formasaun nivel baixarelatu, atu nune’e sira bele prienxe kritériu sira tanba agora daudaun kuaze profesór ho grau akadémiku lisensiatura barak loos maibé la hetan oportunidade atu hanorin.

Profesór 48 ho diploma ensinu sekundáriu ne’e hanorin iha eskola públiku rua de’it. ida hanorin iha eskola Ensinu Sekundáriu Jerál Hera no ida seluk hanorin iha eskola Ensinu Sekundáriu Jerál 12 de Novembru Becora no restu hosi ida-ne’e hanorin hotu iha eskola privadu sira.

“Loloos profesór ho diploma ensinu sekundáriu ne’e bele hanorin maibé iha nivél edukasaun Pre-Eskolár. Ida-ne’e mós sira presiza tuir lai formasaun ruma oinsá atu anima labarik sira iha aula laran, atu nune’e bele lori labarik sira durante oras rua nia laran,” nia dehan.

Agora ho situasaun hanesan ne’e mak dirasaun servisu edukasaun Dili la buka atu hatene didi’ak ba futuru mak identifika katak profesór diploma ensinu sekundáriu mak pasa iha selesaun dokumentu depois sira baixarelatu ka lisensiatura la pasa, kulpa ne’e sei fila-fali mai dirasaun edukasaun Munisípiu Dili ninia responsabilidade.

“Tanba ne’e mak buat ne’ebé ladi’ak buka atu hadi’a keda atu futuru mai labele akontese tan,” nia hateten.

Jornalista : Tomé Amado

Editór      : Cancio Ximenes

iklan
iklan

Leave a Reply

iklan
error: Content is protected !!