DILI, 06 marsu 2023 (TATOLI) – Membru Polísia Nasionál Timor-Leste (PNTL) hosi Eskuadra Dom Aleixo Primeiru Serjentu Alsino da Silva hetan sona hosi ema ida, bainhira halo atuasaun ba problema iha área Fatumeta, Suku Bairru Pité, Munisípiu Dili.
Kazu ne’e kontese maizmenuz iha 00:30, iha segunda (6/1) ne’e.
Tuir kronolojia ne’ebé Portavós Komandu Jerál PNTL Arnaldo Araujo relata katak membru PNTL hetan sona husi ema ida iha nia parte liman, bainhira membru Polísia ne’e ho ekipa patrolla hosi Eskudra Dom Aleixo bá halo atuasaun ba problema ida ne’ebé akontese iha Fatumeta.
“Iha momentu ne’e ita-nia lezadu ida hato’o keixa liuhosi telefone ba Komandu PNTL Munisípiu Dili tanba nia hetan agresaun hosi nia maluk ne’ebé mak sira hetan iha uma ida. Entaun ita-nia Eskuadra Dom Aleixo halo kedan intervensaun hodi to’o o kedan fatin ne’ebá”, Arnaldo Araujo hateten ba jornalista sira iha Kuartel Komandu PNTL Caicoli, segunda ne’e.
Nia informa, bainhira PNTL Eskuadra Dom Aleixo to’o iha fatin ne’ebá, suspeitu ne’e iha hela uma-laran, bolu nia hosi liur, maibé nia nunka sai.
“Nia (suspeitu) hateten katak sé mak tama mai ha’u sona mate”, nia dehan.
Ho nune’e, suspeitu ne’e sai mai hambrik iha odamatan depois nia halai sai mai sona membru polísia ne’e.
“Entaun membru ne’e hakiduk ba kotuk no to’o monu, depois supeitu mai sona dala rua iha liman no atu ba dala tolu mak membru polísia ne’e hakilar hodi dehan ami polísia, para….! para…! sé la para ami tiru. Maibé suspeitu ne’e kontinua halo asaun atu sona tán fali komandante sesaun ne’ebé ekipa operasaun ne’e no haree ba ida ne’e, komandante sesaun ne’e tiru ema ne’e nia ain, nu’udar jestu hodi halo auto defeza ba nia aan”, Arnaldo Araujo hateten.
Nia esplika, kuandu polísia halo atuasaun mak hetan ameasa iha zona risku, ida ne’e polísia sei halo auto defeza ba ami nia aan,
“Tanba ne’e mak ami halo tiru ida iha suspeitu nia ain nia monu ba rai”, nia informa.
Arnaldo hateten, oras ne’e daudaun sidadaun ne’e, tantu membru polísia ne’ebé hetan sona iha parte liman halo ona tratamentu iha Hospitál Nasionál Guidu Valadares.
Nia hateten, ba kazu ne’e rasik Komandu PNTL agora halo hela investigasaun hodi buka hatene motivu loloos hosi kazu ne’e.
Jor nalista: Natalino Costa
Editór : Zezito Silva
