TL-Kamboja asina akordu kooperasaun iha aviasaun sivíl
DILI, 06 marsu 2023 (TATOLI) – Timor-Leste (TL) ho Kamboja asina akordu kooperasaun iha aviasaun sivíl, segunda ne’e, iha Ministériu Negósiu Estranjeiru no Kooperasaun (MNEK).
Ministru Transporte no Komunikasaun, José Agustinho da Silva, dehan nasaun rua ne’ebé asina akordu ne’e nu’udar kontinuidade hosi atividade vizita Estadu hosi Prezidente Repúblika, José Ramos Horta iha tinan kotuk.
“Ohin ita asina instrumentu implementasaun ba servisu aéreo, hafoin faze ida ne’e, MTK no mós Ministériu Negósiu Estranjeiru no Kooperasaun sei lori dokumentu ida ne’e, ba ajenda iha Konsellu Ministru no ba Parlamentu Nasional atu prosede ba ratifikasaun, atu sai baze ba Governu Kamboja hodi deside sira-nia aviaun ruma liga konetividade aéreo entre nasaun rua ne’e”, José Agustinho da Silva, hateten iha salaun MNEK.
Nia dehan, objetivu prinsipál hosi akordu aéreo mak atu fasilita no transporta sasan no pasajeiru sira.
“Ha’u hakarak hato’o ha’u-nia apresiasaun no agradesementu ba Governu no povu Kamboja ba sira-nia apoia tomak ba Timor-Leste nu’udar nasaun membru ba organizasaun rejionál ASEAN”, nia dehan.
Nia dehan, nu’udar nasaun iha kontinente rejionál ASEAN nian, nafatin esforsu atu bele apoia malu ba dezenvolvimentu ba kada nasaun nian no oinsá mak fó moris di’ak ba povu.
“Nu’udar nasaun Estadu membru ba organizasaun jerionál ASEAN, konetividade aéreo, marrítima no dezenvolvimentu telekomunikasaun ne’e mós nu’udar rekezitu importante ida, adezaun Timor-Leste ba ASEAN” nia adiante.
Iha ámbitu asina akordu, Timor-Leste marka tan pasu ida ba oin iha setór aviasaun sivíl, liuhosi asinatura ne’ebé realiza.
“Akordu ne’e laiha limitasaun, ida ne’e kontinua nafatin, ba futuru la’os iha setór aviasaun de’it maibé sei halo luan liután kooperasaun iha área sira seluk ne’ebé ita presiza”, ministru afirma.
Iha okaziaun ne’e, Ministru Sekretariadu Aviasaun Sivíl Kamboja, Mao Havannal, hateten asinatura ba akordu ne’e importante tebes ba nasaun rua liuliu iha área aviasaun sivíl nian.
“Asina memorandu ne’e importante tebes entre nasaun rua liuliu iha aviasaun sivíl nian, akordu ne’e asina ona, ba oin bele liga vó direta hosi Kamboja mai Dili no Dili ba Kamboja, ita sei implementa iha tempu besik karik prosesu sira los ona”, nia konklui.
Jornalista: Hortencio Sanchez
Editór : Zezito Silva
