MNEK sei haruka diplomata 19 destaka iha rai-li’ur
DILI, 09 marsu 2023 (TATOLI) – Diresaun Nasionál Rekursu Umanu, Sekretaria-Jerál, Ministériu Negósiu Estranjeiru no Kooperasaun (MNEK) organiza indusaun ba Primeiru Grupu Diplomata tinan 2023, hamutuk ema na’in-19, ne’ebé mak sei koloka iha Konsuladu-Jerál Timor-Leste iha Bali, Darwin no Sídney ho Embaixada Timor-Leste balun iha Jakarta, Malázia, Filipinas, Vietname, Koreia Súl, Japaun, Kuba no Maputu.
“Indusaun ne’e hala’o ho objetivu atu prepara ho di’ak funsionáriu hirak ne’ebé selesionadu ba faze dahuluk, iha tinan ida ne’e, sira hala’o ona sira knaar nudar diplomata atu bele reprezenta Timor-Leste iha mundu ho dignu”, tenik iha komunikadu ne’ebé Agência TATOLI asesu, ohin.
Durante indusaun ne’e, diplomata sira mós hetan matéria aprezentasaun oin-oin, hanesan introdusaun kona-ba polítika MNEK, informasaun kona-ba polítika rai laran, oinsa atu hala’o relasaun diplomátika iha rai liur ho sessaun ida atu familiariza diplomata sira kona-ba fatin ka misaun ne’ebé sira atu koloka ba.
Kona-ba introdusaun polítika MNEK nian, formadór sira aprezenta matéria kona-ba lei órganika MNEK nu’udar dokumentu importante ne’ebé sei orienta mós diplomata sira nian lalaok no koordenasaun hosi rai liur ho kapital.
Aleinde ne’e, sensibiliza mós diplomata sira kona-ba sira nian papel no responsabilidade atu kontinua tane’e a’as valor no espíritu patriótiku ho disiplina bainhira reprezenta estadu no nasaun iha rai liur atu fasilita sira nian misaun iha rai liur ho di’ak.
Iha faze daruak kona-ba polítika rai laran, formadór sira esplika no fó hanoin ba diplomata sira katak atu reprezenta estadu ho di’ak no dignu, importante tebes atu kuñese ho di’ak perfil nasaun ne’ebé diplomata sira atu reprezenta no intende ho di’ak no lolos polítika interese estadu ho nasaun, nune’e, diplomata sira bele artikula ho di’ak informasaun hirak ne’ebé relasiona ho interese Estadu.
Entretantu, formadór sira mós atualiza diplomata sira kona-ba progresu ikus Timor-Leste nian adezaun atu sai nu’udar membru plenu ba ASEAN no asuntu sira kona-ba fronteira rai maran no tasi, inklui mós informasaun ikus kona-ba explorasaun rekursu enerjétika iha tasi Timor.
Tuir komunikadu, atu asegura reprezentasaun Estadu ho loloos, formadór sira elabora ho klean matéria sira kona-ba Konvensaun Vienna ba Relasaun Diplomátika no Relasaun Konsular, basa dokumentu importante rua ne’e sai nu’udar dokumentu sira ne’ebé diplomata sira presija atu kumpriende no observa ho didiak, nune’e bele orienta sira nian atividade no servisu loron-loron durante sira nian misaun iha rai liur.
Durante indusaun loron hirak nian laran, diplomata sira partisipa ho ativu no nakonu ho interasaun entre sira ho formadór sira.
Partisipa iha indusaun ne’e, diplomata grupu dahuluk ne’ebé selesionadu ba tinan 2023 hodi reprezenta Estadu iha rai liur no formadór sira hanesan Embaixadór, Diretór-Jeral no Diretór sira ne’ebe iha ona esperiénsia kolokasaun iha rai liur no kuñesimentu kle’an kona-ba knaar Diplomata nian.
Iha okaziaun ne’e, formadór sira partilla mós matéria sira ne’ebé kona-ba regra no prosedimentu hotu ba kestaun administrativa, mekanizmu no regulamentu ba jestaun finansa públika, elaborasaun planu no submisaun relatóriu tuir estrutura foun orsamentu 2023, prosedimentu kona-ba aprovizionamentu, kontratasaun públika no kestaun sira seluk kona-ba dezenvolvimentu pessoal ho kódigu konduta ba servisu perifériku iha rai liur, asuntu konsular, protesaun ba sidadaun sira, prosedimentu no koordenasaun protokolar iha misaun no entre misaun ho kapital no etiketa ho kortezia iha prátika diplomasia.
Tamba ne’e, diplomata sira halo ezersísiu makas kona-ba dokumentu importante sira hanesan konstituisaun RDTL ne’ebé sai nu’udar mata dalan ba polítika externa, planu estratéjiku dezenvolvimentu nasionál no Timor-Leste nian polítika externa.
Atu familiariza diplomata sira ho fatin hirak ne’ebé sira atu koloka ba, formadór sira fahe mós informasaun kona-ba fatin hirak ne’e, nune’e diplomata sira bele prepara ho diak liu tan molok dezloka ba fatin ne’ebé dezigna ona.
Indusaun ne’e, organiza hosi Diresaun Nasionál Rekursu Humanu ho Sentru Formasaun Diplomátika, Sekretaria-Jerál MNEK.
Jornalista: Hortencio Sanchez
Editór : Zezito Silva
