DILI, 08 marsu 2023 (TATOLI)— Turista internasionál sira ne’ebé ohin mai vizita Timor-Leste ho ró Kruzeiru MS Paul Gauguin husi Austrália kontente tebes, tanba bele haree besik sítiu turístika sira no hatene istória Timór nian.
Ró Kruzeiru MS Paul Gauguin husi Austrália, to iha Portu Dili, kuarta ne’e. Ró ne’e tula turista hamutuk 204 husi nasaun oin-oin hanesan Austrália, Amerika, Nova Zelandia, Inglaterra, Polónia, Kánada, Brazil no Indonézia. Husi totál ne’e la inklui ho tékniku sira ne’ebé servisu iha ró laran.
Antes ne’e, iha loron 02 fevereiru 2023, ró Kruzeiru MS Paul Gauguin husi Austrália ne’e tula ona turista internasional mai vizita Timor-Leste.
Iha vizita ne’e, turista hosi Estadu Unidu Amérika, Judi Drake, sente kontente vizita Timor-Leste, tanba hosi vizita ne’e nia bele ba haree besik fatin turístika sira hanesan Cristo Rei, Maubara, Sentru Produsaun Kafé iha Ermera, no fatin istóriku sira hanesan Centro Nacional Chega (CNC), Arkivu Muzeu Resisténsia Timorense no Merkadu Tais, Dili.
Notisia relevante : 02 fevereiru, turista 232 ho ró Kruzeiru MS Paul Gaugauin sei atraka iha Dili
“Ha’u sente kontente tebes iha ha’u-nia vizita ida ne’e tanba bele haree besik sítiu turístiku iha Timor-Leste. Maibé ha’u sente triste bainhira vizita fatin istóriku CNC Balide Dili ne’ebé rai arkivu istória no imajen pasadu povu Timor-Leste nian. Ha’u mos sente triste tebes istória pasadu ne’ebé nakonu ho sofrementu,” Judi Drake hateten ba jornalista iha Portu Dili, kuarta ne’e.
Nune’e mos turista, Remy Kampfer ne’ebé hosi Suísa, hateten, nia parte sente kontente bainhira halo vizita ba fatin turizmu iha Maubara Liquiça hodi haree besik igreja eis prizaun Maubara ne’ebe furak tebes.
“Ha’u gosta produtu lokál sira iha Maubara hanesan masin Timór no nuu fuan nurak sira ho sabor ne’ebe gostu tebes. Ida ne’e ha’u gosta loos tanba iha Suísa rasik laiha nuu nurak,” nia dehan.
Kona-ba infraestrutura iha Timor-Leste nia parte haree daudaun ne’e la’o hela maibé ba Portu Tibar rasik tuir nia haree nu’udar odamatan modernu ida no úniku tebes iha Timor-Leste.
Jornalista : Arminda Fonseca
Editora : Armandina Moniz
