iklan

JUSTISA, HEADLINE

PST submete ona lista kandidatura ba Tribunál Rekursu

PST submete ona lista kandidatura ba Tribunál Rekursu

Vise-Prezidente asuntu protokolu, Partidu Sosialista Timor (PST), Luis Maria Lopes, hafoin aprezenta lista kandidatura PST nian ba Tribunál Rekursu.Imajen Tatoli/Anito Soares

DILI, 13 marsu 2023 (TATOLI) Vise Prezidente asuntu protokolu, Partidu Sosialista Timor (PST), Luis Maria Lopes, hateten PST nia prezensa iha Tribunál Rekursu ho objetivu atu aprezenta lista kandidatura partidu PST.

“Ami mai marka prezensa iha ne’e, atu aprezenta lista Partidu Sosialista Timor (PST) liuliu ba ami-nia ema ne’ebé maka atu ba futuru deputadu hosi Partidu Sosialista Timor nian”, Luis Maria Lopes, hateten ba jornalista sira hafoin remata aprezentasaun lista kandidatura PST nian ba Tribunál Rekursu, segunda ne’e.

Nia dehan, PST priénse ona kritériu sira ne’ebé hosi Komisaun Nasionál Eleisaun (CNE, sigla portugés) no Tribunál Rekursu fó.

“Sim ami priénse ona kritériu ne’ebé parte CNE no Tribunál Rekursu husu no ami konklui ona, tanba ne’e mak ohin ami submete ona mai iha Tribunál Rekursu no ami-nia lista Tribunál Rekursu simu tiha ona. Ami hein desizaun hosi Tribunál Rekursu de’it”, nia informa.

Nia esplika, lista kandidatura ne’ebé mak PST aprezenta mai Tribunál Rekursu iha ema 90, hirak ne’e iha lista efetivu 65 no lista suplente iha ema 25.

“Iha númeru primeiru ne’e okupa hosi ami-nia Prezidente Partidu PST Abelino Coelho, tuir kedan okupa hosi ami-nia Sekretáriu Jerál Partidu no tuir kedan númeru terseiru lista kandidatura ne’e feto”, Luis Maria Lopes katak.

Lei partidu polítiku tenke fó ba feto hodi okupa iha pozisaun sira. Tanba ne’e iha lista kandidatura PST nian, iha lista efetivu feto iha nain-21 no lista suplente feto nain sia (9).

Luis Maria Lopes, fiar katak PST sei liubá bareira pursentu haat hodi sai reprezentivu iha uma fukun Parlamentu Nasionál tinan ne’e.

‘’PST ida uluk laos hanesan agora, tanba agora ne’e reforsa de’it hosi apoiante no militante Estudante Brigada Revolusionáriu ne’ebé mak mai hosi Universitáriu iha Díli laran inklui joven revolusionáriu sira hosi munusípiu 13 inklui RAEOA´´, nia konklui.

Jornalista: Natalino Costa

Editór : Zezito Silva

iklan
iklan

Leave a Reply

iklan
error: Content is protected !!