AAE-UNTL husu senadu konfirma KO kansela atividade orientasaun
DILI, 14 marsu 2023 (TATOLI)– Portavós Asosiasaun Akadémika Estudantíl Universidade Nacional Timor Lorosa’e (AAE-UNTL), Julião Ximenes Castelhano, hateten AAE-UNTL tau konfiansa ba senadu sira atu halo konfirmasaun ho Estrutura Universidade liu-liu Prezidente Komisaun Organizadora (KO) ne’ebé kansela atividade orientasaun ba estudante foun tinan akadémiku 2023.
Notísia Relevante: Senadu UNTL sei lori estudante foun hasoru PN iha aban
Nia hatutan, bazea ba desizaun ne’ebé fó sai hosi Prezidente komisaun organizadora no atuál Vice Reitór trata asuntu akadémika, Samuel Venâncio, katak tinan ida-ne’e laiha orientasaun akadémika tanba UNTL kansela ona atividade ne’e presiza husu klarifikasaun.
“Ami hakarak informa ba públiku liu-liu ba inan-aman no estudante foun sira katak, ita-nia Senadu sira sei tur hamutuk hodi ko’alia ho estrutura UNTL ligadu ho Avizu ne’ebé fó sai ona hosi Prezidente Komisaun Organizadora ba Orientasaun Akadémika Vice-Reitór trata Asuntu Akadémika Samuel Venâncio katak tinan ne’e laiha Orientasaun Akadémika tanba UNTL kansela ona atividade ne’e, tenke husu ninia klarifikasaun,” nia dehan ba jornalista sira liu-hosi konferénsia imprensa ne’ebé halo iha kampus sentrál UNTL, tersa ne’e
Porta AAE-UNTL ne’e esklarese no klarifika ba públiku liu-liu ba inan-aman no estudante foun UNTL tinan akadémika 2023 ligadu ho asaun pasifika ne’ebé organiza hosi Senadu sira hodi boikota atividade orientasaun ba estudante foun sira iha segunda (13 marsu 2023), tanba konsidera estrutura UNTL prinsipalmente Reitór ho nia estrutura la preparadu hodi realiza Orientasaun akadémika UNTL inklui halo diskriminasaun ba estudante foun ano letivu de 2023.
Tanba, nia dehan, iha estudante balun ne’ebé selu ona bele tuir orientasaun akadémika no balun sei kontinua forma hodi halo pagamentu no rejistu, nune’e senadu sira blokeia totalmente Orientasaun Akadémika tanba hakarak estudante sira selu hotu mak tuir orientasaun dala ida hodi nune’e bele iha tratamentu hanesan no justu.
Tuir nia, senadu sira hakarak estrutura UNTL tenke buka mekanizmu hodi hadi’a sistema atendimentu ba estudante liu-liu iha pagamentu no administrasaun akadémika, hodi nune’e bele rezolve problema estudante sira-nian hanesan labele dudu malu no labele hamriik tan iha loron manas hodi foti dokumentu.
Ne’eduni, senadu estudantíl hamutuk ho Estudante UNTL prinsipalmente estudante foun sira hakarak deklara ba públiku katak, asaun ne’ebé horisehik akontese iha UNTL sentrál ho natureza nu’udar aktu ida hodi kontribui ba mudansa no atu motiva estrutura UNTL hodi bele halo reflesaun, hodi buka mekanizmu hodi mellora servisu atendimentu estudantíl nian liu-liu iha Pagamentu no Administrasaun Akadémika no tau másima atensaun ba preokupasaun no problema estudante sira-nian.
Tanba ne’e, senadu sira sei informa ba inan-aman no Estudante foun sira katak senadu sira sei haruka karta ba Presidente Konsellu Jerál UNTL hodi konvoka reuniaun extraordinária ida hodi bele ko’alia kona-ba problema estudante nian.
Sei Informa mós ba inan-aman no estudante foun sira katak, Senadu sira sei hato’o mós problema estudante sira-nian ba iha parlamentu nasionál no mós ba Ministériu Ensinu Superiór hodi husu Reitór bele Rezolve problema sira-ne’e.
Senadu mós sei informa ba inan-aman no estudante foun sira katak, estudante ne’ebé admitidu ona hodi asesu ba UNTL bele kontinua selu ka bele hasoru senadu sira atu nune’e bele buka dalan hodi koordena ho estrutura UNTL hodi rezolve problema ne’e.
Enkuantu avizu ne’ebé Prezidente Komisaun Organizadora, atuál Vice Reitór trata asuntu akadémiku no garante kualidade, Samuel Venâncio, fó sai ona ba públiku ho karáter informa ba estudante foun tinan letivu 2023 katak orientasaun akadémika sei laiha no prosesu ensinu sei hahú direitamente iha kada fakuldade ida-idak no avizu ne’ebé KO públika ba públiku liuhosi karta formál UNTL nian ho númeru 04/UNTL/COOA.23/III/2023.
Entretantu, senadu jerál UNTL, Cristovo Araújo Mau-to, hateten nia parte sei halo konfirmasaun ho KO no atuál Vice Reitór Samuel atu husu ninia klarifikasaun tanba saida mak fó sai ona avizu katak tinan ida-ne’e UNTL kansela orientasaun ba estudante foun ne’e sira ninia motivu saida.
“Ami konsidera katak laiha nesesidade ida kuandu UNTL kansela orientasaun ba estudante foun sira iha tinan ida-ne’e no sei halo ba tinan oin. Maibé konfirmasaun ne’e ami halo tiha ho parte UNTL depois mak ami sei deklara ami-nia pozisaun ba públiku kona-ba orientasaun ne’e,” nia dehan.
Jornalista : Tomé Amado
Editór : Cancio Ximenes
