DILI, 15 marsu 2023 (TATOLI) – Governu aprova proposta lei kona-ba rejime estraordináriu kompensasaun ba obra sira ne’ebé hala’o ona sein formalizasaun kontratuál, aprezentandu husi Vise-Primeiru-Ministru no Ministru Planu Ordenamentu, José dos Reis.
“Diploma ne’e prevee kriasaun komisaun espesiál ida atu avalia ba serbisu sira ne’ebé hala’o ona no aprezenta proposta kontratu tranzasaun ida ba empreza idaidak. Efikásia husi kontratu ne’e sei depende ba revizaun espresu husi Kámara Kontas nian”, Ministru Prezidénsia Konsellu Ministru, Fidélis Magalhães informa iha Palásiu Governu, kuarta ne’e.
Porta-voz Governu ne’e haklaken katak identifika ona projetu 44 ne’ebé aprova husi Konsellu Ministru kona-ba Administrasaun Fundu Infraestrutura, ne’ebé nunka formaliza iha kontratu, nune’e projetu balun konkursu ne’e ezekuta tiha ona.
Projetu proposta lei ne’e atu estabelese mekanizmu kompesasaun ne’ebé justu ba empreza sira ne’ebé hala’o ona serbisu ne’e, konsidera kustu sira ne’ebé gasta ona.
Jornalista: Antónia Gusmão
Editora: Maria Auxiliadora
