MapKoms hala’o diálogu komunitária iha suku Maina II

LAUTÉM, 22 marsu 2023 (TATOLI) –Ministériu ba Asuntu Parlamentár no Komunikasaun Sosiál (MapKoms), kuarta ne’e, realiza diálogu komunitária ho komunidade hosi zona altu lalenu, iha suku Maina II, postu administrativu Lautém, munisípiu Lautém.

Ministru Francisco Martins da Costa Perreira Jerónimo, esplika, prezensa iha área refere atu rona no rejista preokupasaun komunidade kona-bá asuntu sosiál ne’ebé enfrenta iha baze hanesan setór edukasaun, infraestrutura, saúde no seluk tán hodi hato’o ba institusaun relevante sira iha VIII governu.

“VIII Governu Konstitusionál liuhosi ha’u nu’udar MapKoms iha programa importante ne’ebé tenke halo diálogu ho komunidade sira katak governu mai to’o komunidade nia leet hodi hatene saida de’it mak presiza no espalla informasaun ho loloos,” Governante hateten iha suku Maina II.

Objetivu hosi diálogu ne’e hakarak fahe informasaun kona-bá susesu ne’ebé VIII governu lideradu Primeiru Ministru Taur Matan Ruak hanesan dezenvolvimentu setór sosiál inklui dezafiu no planu programa tinan-2023 nian.

Maske mandatu governu tinan-ne’e sei remata maibé komitmentu VIII governu sei kontinua atu kontinua programa, liuliu atividade ne’ebé direitamente benefísia ba povu antes entrega mandatu governasaun foun liuhosi eleisaun parlamentár.

“Dezenvolvimentu ne’e tenke halo la’ós de’it iha nasionál maibé presiza implementa iha nível baze, komunidade iha rurál liuliu fatin ne’ebé presiza tebes fó atensaun,” Francisco Martins akresenta.

Governante ne’e konsidera komunidade mak sai alvu ba dezenvolvimentu nune’e prezensa dezenvolvimentu iha baze importante, liuliu iha zona altu lalenu ne’ebé tempu okupasaun Indonézia sai sentru konsentrasaun FALINTIL iha ponta leste hodi hahú re-organiza funu.

Xefi suku Serelau, postu administrativu Lautém, Dionísio Soares, agradese ba prezensa MapKoms no susesu durante mandatu VIII governu lideradu PM Taur Matan Ruak.

Dionísio Soares levanta mós kondisaun infraestrutura estrada no postu saúde ne’ebé sai prekupasaun ba komunidade iha zona altu lalenu, liuliu suku Serelau tanba durante ne’e ministériu relevante seidauk fó prioridade.

“Hau rasik hamutuk ho xefe suku na’in-tolu seluk asina lori ba MOP, maibé hein ba hein maibé buat ida la akontese, loos duni iha ona survey ida hosi konsultan sira dehan atu dezeñu depois sei loke ba tender, ami espera ida-ne’e bele akontese duni,” Dionísio Soares hateten.

Nia husu governu atu fó rekoñesimentu ba família saudozu Cabral ligadu ho partisipasaun durante luta kontra okupasaun Indonézia iha altu lalenu.

Diálogu iha altu lalenu, postu administrativu Lautém, munisípiu Lautém partisipa hosi autoridade suku sira, administradór postu Lautém, PNTL munisípiu Lautém no komunidade zona altu lalenu.

Notísia relevante: Estrada suku Maina II difikulta transporta produtu ba merkadu

Jornalista    : Natalino Belo

Editór           : Evaristo Soares Martins