DILI, 23 marsu 2023 (TATOLI) – Diretór Ezekuitvu Saúde ba Ema Hotu (SABEH) Andre Belo, rekorda durante iha 2022, SABEH rejista moras jerál hamutuk 8.060 iha área remota iha Timor -Leste laran tomak.
“Durante 2022, SABEH rejista moras ne’ebé jerál hamutuk 8.060, husi ne’e maioria moras Infesaun Vias Respiratóriu liuliu ba labarik sira, tuir mak pneomonia, tuberkoloze, moras kulit, má nutrisaun, inan sira anemia, tensaun alta, entaun ida ne’e mak ita identifika iha área remota ne’eba”, Andre Belo hateten.
Nia dehan, SABEH bainhira identifika ona moras sira ne’e mak halo kedan tratamentu direta ba populasaun sira.
“Ita haree ida ne’ebé mak ita kura, ita fó kedas atendimentu ne’eba no iha pasiente balun ne’ebé presiza halo tratamentu kontinuasaun, hanesan tensaun alta depois ami identifika moras TB, ida ne’e ami haruka ba postu saúde sira ne’ebé iha atu halo tratamentu depois mak ami kontrola sira”, nia afirma.
Nia esplika, bainhira SABEH to’o komunidade sira nia leet, sensibiliza mós informasaun ba komunidade sira tanba populasaun balun laiha koñesimentu, entaun SABEH fó hanoin atu sira halo taratmentu regulár no nafatin halo prevensaun ba sira nia-aan.
“Tanba ne’e, ami nafatin haforsa promosaun ba prevensaun, depeois ami identifika moras, ami fó tratamentu ba sira tuir sira nia moras ne’ebé mak iha”, nia subliña.
Nia informa, dezafiu ne’ebé SABEH hasoru mak komunidade barak mak seidauk hatene loloos servisu SABEH nian durante ne’e.
“Ami hasoru desafiu mak durante ne’e ema barak iha rai laran seidauk hatene se mak SABEH, entaun ami lao ba komunidade, ami tenke sensibiliza informasaun atu sira hatene no hakbesik mai ami hodi hetan tratamentu”, nia tenik.
Nia akresenta, iha dezafiu seluk mak bainhira medikamentu menu, SABEH halo pedidu ba SAMES mós resposta ho tempu ne’ebé naruk.
“Bainhira ami atu la’o ba área remota, antes ne’e ami halo pedidu ba SAMES maibé resposta ho tempu ne’ebé naruk, entaun ami rasik hasai osan oitauan, kompra aimoruk hodi lao ba área remota hodi fó atedimentu ba ita-nia komunidade”, nia hatutan.
Nia esplika, parseiru sira ne’ebé mak apoiu atividade SABEH nia mak Empreza Telemor, BNCTL, amigu SABEH sira ne’ebé mak servisu iha rai liur. Hirak ne’e mak apoiu finanseiru no apoiu lojístika atu SABEH to’o ohin loron nafatin eziste no halo atendimentu ba komunidade sira iha área remota.
Entertantu, SABEH ho nia ema volutáriu hamutuk 500, hirak ne’e 125 mak ativu fó tratamentu regular ba komunidade iha área remota.
Jornalista : Felicidade Ximenes
Editór : Zezito Silva
