Estrada Eraulo kotu, MOP deside monta ponte provizóriu
DILI, 23 marsu 2023 (TATOLI)— Ministériu Obra Públika (MOP) liuhosi Diresaun Jerál Estarda, Ponte Prevensaun no Kontru Seia, (DJEPPKS) sei monta ponte provizóriu ba estrada ne’ebé kotu iha suku Eraulo, postu administrativu Letefoho, munisípiu Ermera tanba kauza udan.
Ministru Obra Públika, Abel Pires, hateten estrada refere, kotu iha loron sabadu (18/03/2023) no tékniku sira hosi DJEPPKS normaliza ona estrada refere iha loron 20 marsu, maibé iha kalan ne’e kedas udan mota tun sobu fali deit.
“Ohin ita-nia tékniku sira ba ona Eraulo ko’alia ho kompañia monta de’it ponte provizóriu ba estrada ne’e hodi bele dura fasilita komunidade iha área refere,” Abel Pires hateten ba jornalista iha Palásiu Governu Dili, kuarta.
Nia dehan, presiza monta ponte provizóriu iha área refere tanba, estrada ne’e rasik fasilita komunidade halo movimentu hosi postu administrativu Letefoho no Atsabe mai Gleno, kapitál Ermera nian.
“Kompañia ne’ebé sei monta ponte provizóriu ba estrada Eraulo ne’e mak kompañia nasionál Monte Veadu. Tanba daudaun ne’e, sira halo hela projetu manutensaun ba estrada iha Letefoho ba Atsabe nian,” nia hateten.
Notisia relevante : MOP halo ona atendimentu emerjénsia ba estrada kotu iha Eraulo Letefoho
Jornalista : Arminda Fonseca
Editora : Armandina Moniz
