AIFAESA,I.P loke prosesu foun hasoru empreza Timor-Food ba Ministériu Públiku

DILI, 24 marsu 2023 (TATOLI)— Autoridade Inspesaun no Fiskalizasaun Atividade, Ekonómika Sanitária no Alimentár, Institutu Públiku (AIFAESA,I.P), sei loke prosesu foun hasoru empreza Timor Food ba Ministériu Públiku (MP) tanba, sobu ou kore fali produtu asukarada ne’ebé antes ne’e halo ona selajen.

Sub-Inspetór Jerál, Dionísio Neto da Silva, hateten, sira-nia parte halo fali prosesu foun ba Empreza Timor Food tanba, antes ne’e ekipa konjunta halo ona selajen ba produtu bebida asukarada no masin midar maibé sira kore hodi faan fali sem iha informasaun ba parte AIFAESA,I.P no ministériu relevante sira.

“Semana ne’e, ita-nia ekipa deteta Empreza Timor Food, kore fali  produtu bebida non alkoólika no masin midar ne’ebé antes ne’e halo ona selajen. Tanba, antes ne’e AIFAESA,I.P no ministériu relevante sira halo ona selajen no ninia proses iha hela MP no seidauk iha rezultadu. Maibe agora, sira kore ka sobu sasan hirak ne’e hodi ba faan fali.  Ida ne’e kategória krime no ita loke fali prosesu foun hodi entrega fali ba  MP,” Dionísio Neto da Silva isplika ba Agência Tatoli, iha, City 8, kinta ne’e.

Notisia relevante : AIFAESA,I.P halo selajen ba produtu masin-midar saku 14.117 iha loja Alfa Dili

Nia dehan, asaun ne’ebé Empreza Timor Food halo ne’e kategória krime tanba produtu sira ne’ebé halo ona selajen. Signifika produtu sira ne’e iha hela problema nia-laran, no atu uza fali produtu sira ne’e bainhira iha ona rezultadu hosi MP mak foin bele uza.

“Ida ne’e krime entaun ita haruka ba MP mak foti sansaun. AIFAESA,I.P sai hanesan partisipasaun ba prosesu ida ne’e. Ita prosesa tuir kódigu penal 250 kona-ba krime kebra selajen,” nia hateten.

Nia dehan, ekipa konjunta ne’ebé daudaun halo inpesaun ba produtu sira ne’e, foin deteta empreza Timor Food mak sobu  produtu ne’ebe iha ona selajen.

“Hosi janeiru to’o mai marsu 2023 AIFAESA,I.P prosesa ona empreza sira ne’ebé halo espekulasaun no asambarkamentu ba presu. Daudaun ne’e, ita prosesa ona empreza 11 ba Ministériu Públiku. Seluk sei iha prosesu nia-laran, tanba ita la’o tuir  dekretu lei Nú.29/2011. Nomos sira kontra lei  Nú. 4/2011 kona-ba krime asambarkamentu no espekulasaun ba produtu,” Dionísio hateten.

Kona-ba sansaun sira, ida ne’e depende ba MP mak foti. Sansaun ne’e bele administrativa no pena prizaun maibé desizaun sira ne’e,   MP mak bele foti. 

Jornalista : Arminda Fonseca

Editora      : Armandina Moniz