DILI, 25 marsu 2023 (TATOLI) – Prezidente Federasaun Futeból Timor-Leste (FFTL), Francisco Jerónimo informa, maiu mai ne’e sei realiza kopa Telkomcel-FFTL iha Munisípiu hotu tanba ne’e jogadór sira iha área rurál sei asesu ba jogu ne’e.
“Kopa Telkomcel-FFTL sei realiza maiu agora entaun ami tenke ko’alia ho asosiasaun futeból Munisípiu hotu atu nune’e, sira bele halo preparasaun ne’ebé masimu antes ba kompetisaun,” Prezidente FFTL ba Agência TATOLI, iha salaun Xanana Sport Centre Dili, sábadu ne’e.
Tanba ne’e, nia husu ba Prezidente Asosiasaun Munisípiu hotu atu halo serbisu masimu nune’e submete klube sira ne’ebé atu partisipa nia naran no jogadór nia naran atu bele halo rejistrasaun naran klube no jogadór ba iha Sistema Federation International Football Assosiation (FIFA).
Ho nune’e kriteria ba kada asosiasaun tenke rejistu klube tenke liu hosi 10 ba leten no barak liu tan di’ak liu depende ba jestaun asosiasaun nian.
“Jogu ne’e hanesan ne’e, primeiru sira sei joga iha nível Munisipál no ikus klube ne’ebé mak sai kampiaun iha Munisípiu sei mai joga fali iha rejionál tanba ami sei fahe ba rejiaun haat, sira sei hasoru malu iha rejiaun depois se mak manán foin mai hasoru malu fali iha nasionál,” nia informa.
Enkuantu premiu ba manán-na’in sira iha eventu ne’e sei iha hela prosesu nia laran no sei fó sai iha tempu besik.
Jogu ne’e sei fó oportunidade ba timoroan sira ne’ebé ho idade 17 ka Under 17 (U-17).
Ho nune’e komisaun sira sei simu de’it sidadaun hirak ne’ebé moris iha tinan 2006.
Kriteria ba rejistrasaun ne’ebé halo iha Munisipiu hodi submete mai nasionál mak hanesan jogadór ida sei kompleta, Billete Identidade (BI), Eleitorál, sertidaun batizmu no foto medida 3X4 tahan rua.
Jogu ne’e rasik sei jere direita hosi asosiasaun futeból Munisípiu sira no hetan apoiu orsamentu hosi Telkomcel no FFTL hamutuk rihun $60-resin ba territóriu tomak.
Iha fatin hanesan, Vise Prezidente Asosiasaun Futeból Manufahi (AFM), Alcino Soares, informa, sira-nia parte prontu no preparadu atu realiza jogu Telkomcel-FFTL iha Manufahi.
“Ami nia klube hamutuk 10 ona mak rejistu, ba oin ami fiar klube sira sei mai rejistu tan no tempu besik ami haruka ona naran jogadór klube sira nian mai nasionál atu maiu bele hahú ona jogu,” Alcino informa.
Jornalista :Hortencio Sanchez
Editór : Rafael Ximenes de A. Belo
