DILI, 27 marsu 2023 (TATOLI) – Prezidente Repúblika (PR), José Ramos Horta, hatete knaar ne’ebé nasaun atribui ba Komisáriu-Jerál Henrique da Costa no Komisáriu Pedro Belo nu’udar Komandante-Jerál no Segundu Komandante-Jerál Polísia Nasionál Timor-Leste (PNTL) ne’e todan, maibé fiar katak sei susesu iha misaun.
Afirmasaun ida ne’e Xefe Estadu halo iha ámbitu selebrasaun aniversáriu PNTL ba dala-23 no tomada pose ba Henrique da Costa no Pedro Balo atu lidera PNTL ba períudu tinan tolu.
“Ita sai testemuñu ba [pose] Komandante-Jerál Henrique da Costa no Segundu Komandante Pedro Belo. Ha’u aprezenta ha’u-nia votu susesu tanba knaar ida ne’e knaar todan ne’ebé Estadu entrega ba imi ho valór no prinsípiu sira hanesan disiplina, onra, devér lorloron iha imi-nia fuan”, Horta dehan iha Kuartél PNTL-Unidade Espesiál Polísia (UEP), Bairru Pité, segunda ne’e.
Xefe Estadu husu emposadu sira atu kontinua halo serbisu antesesór sira ba luta kontra infiltrasaun, krime organizadu iha rai-laran.
“Iha tempu badak ha’u hakarak halo diálogu ho komandante no segundu komandante foun”, nia kompromete.
Laureadu Nobel Pás ne’e hato’o apresiasaun ba Komandante-Jerál, Faustino da Costa, no Segundu Komandante-Jerál sesante, Mateus Fernandes, ne’ebé presta ona serbisu di’ak durante mandatu hodi serbí povu no nasaun.
“Durante mandatu imi-nia serbisu todan tanba krize boot ne’ebé nasaun enfrenta, liuliu krize polítiku, inundasaun, pandemia covid-19, ha’u akompaña imi-nia servisu”, nia dehan.
Notísia relevante: https://tatoli.tl/2023/03/15/konsellu-ministru-nomeia-hendrique-da-costa-lidera-pntl/
Komandante-Jerál foun Henrique da Costa agradese ba Governu tanba depozita ona konfiansa ba nia ho ninia Segundu Komandante.
“Ha’u no Segundu Komandante-Jerál hato’o agradesimentu ba Governu tanba depozita konfiansa ba ami na’in-rua ba mandatu tinan-tolu lidera PNTL. Tinan 23 ona PNTL eziste no hala’o funsaun autonomia durante tinan 21 hafoin entrega podér hosi Misaun Nasaun Unida iha Timor-Leste iha 2012”, Henrique da Costa relembra.
Nia kompara ezisténsia PNTL ho idade umanu nian katak instituisaun ne’e tama ona ba adultu. Ida ne’e nu’udar idade formatu ida ba PNTL atubele define nia karaterístika no hamriik firme iha komunidade nia leet.
“Ami aprende hosi ami-nia istória dezenvolvimentu no dezafiu sira iha pasadu ne’ebé apár ba ami-nia ajenda estratéjika atu kontinua dezenvolve PNTL ho ami-nia maturidade”, dehan.
Komisáriu-Jerál ne’e husu apoia potu tomak nian hodi nune’e ninia mandatu ramata ho susesu, maski knaar todan maibé ho ema hotu nia apoiu sei la’o ho di’ak.
Prezidente Repúblika prefere reflesaun iha aniversáriu PNTL ba dala-23
Prezidente Repúblika hatete iha selebra aniversáriu PNTL nian katak instituisaun Estadu sira dala barak selebra tinan ho festa boot, maibé buat importante ne’ebé presiza halo iha ámbitu sira ne’e maka halo reflesaun ba ezisténsia instutuisaun Estadu sira ne’e.
“PNTL halo tinan 23 ona, ita-nia Polísia hahú nia fundasaun iha 2002, wainhira ita selebra instituisaun ruma nia tinan, ita halo selebrasaun, festa, maibé ita tenke halo mós reflesaun entre protagonistas, ajenda, polítika no ajente operasionál”, Horta fó hanoin.
Tanba reflesaun sira hanesan Prezidente Repúblika ho Governu halo liuhusi diskursu sobre Estadu, hodi haree progresu ne’ebé iha no hametin liután instituisaun. “Maibé ita buka mós identifika dezafiu, katak hadi’a buat ne’ebé sala, halo inovasaun maibé ho realista no labele promete barak, sukat didi’ak Timor-Leste nia Produtu Internu Brutu (PIB), kapasidade finanseira”, katak.
“Orgullu tanba PNTL la’o iha tinan 23 nia laran. Haree ba dezenvolvimentu operasionál, institusionál, iha kontradisaun di’ak ba defeza, legalidade demokrátika nasionál, garantia seguransa ba ema nia propriedade, defeza ba direitu sidadaun hothotu. Maibé ita hatene, dalan ida ne’e la’ós tetuk de’it, ita hothotu testemuñu iha tinan sira ne’e nia laran iha xoke grave”, nia argumenta.
Nota pozitivu ida ne’ebé Xefe Estadu rejista mak kriasaun Departamentu Formasaun ne’ebé tuir estratéjia polítika kualifikasaun rekursu umanu iha PNTL, hanesan ba ajente, unidade espesiál sira no misaun atu asegura nia implementasaun ho koordenasaun metin.
“Ha’u fó parabéns no rekoñese medida prioritária ida ne’ebé foin daudaun halo atu kanaliza investimentu liután ba formasaun espesializada ba membru forsa-polisiál. Parabéns mós ba lei orgánika ne’ebé foin daudaun adopta tuir estratéjia ida atu halo promosaun ba igualdade jéneru, la’e ba diskriminasaun iha PNTL nia laran. Ne’e signifika mós iha pozisaun komandu no labele buat sira ne’e ita halo hanesan simbóliku de’it. Tenke halo investimentu boot liu, la’ós de’it iha PNTL ka F-FDTL maibé iha instituisaun hothotu Estadu nian”, nia apresia.
Horta adminte esforsu membru PNTL hotu-nia sakrifísiu ne’ebé hala’o lorloron hodi kumpri misaun, maske iha difikuldade no dezafiu oioin maibé sempre hala’o misaun ho integridade no entrega-aan totál.\
Notísia relevante: Governu halo reestruturasaun orgánika PNTL
Jornalista: Antónia Gusmão
Editora: Maria Auxiliadora
