DILI, 15 marsu 2023 (TATOLI) – Konsellu Ministru, aprova projetu Rezolusaun Governu, ne’ebé aprezenta husi Ministru Interiór, Taur Matan Ruak, kona-ba nomeasaun ba Superintendente-Xefe Henrique da Costa atu ezerse kargu Komandante-Jerál Polísia Nasionál Timor-Leste (PNTL), hodi pomove ba Komisáriu-Jerál.
Ho rezolusaun ida ne’e hapara komisaun servisu atuál komandante-Jerál PNTL, komisáriu Faustino da Costa.
“Nomeasaun ne’e halo bazeia ba lei. Lei ko’alia klaru kona-ba rekizitu sira no grau sira ne’ebé mak bele”, Ministru Prezidénsia Konsellu Ministru, Fidélis Magalhães, hatete iha Palásiu Governu kuarta ne’e.
Biban hanesan Konsellu Ministru mós aprova projetu rezolusaun Governu, ne’ebé mós aprezenta husi Ministru Interiór hodi nomeia Superintendente-Xefe Pedro Belo atu ezerse kargu Segundu Komandante-Jerál PNTL, ho nune’e promove ba Komisáriu. Ho Rezolusaun Governu nian ida-ne’e hapara mós komisaun servisu Komisáriu Mateus Fernandes.
Mandatu ba Komandante-Jerál no Segundu Komandante-Jerál ba períodu tinan tolu.
Notísia relevante: Komandante Jerál PNTL foun tenke ema-ne’ebé ho vizaun kle’an
Jornalista: Antónia Gusmão
Editora: Maria Auxiliadora
