DILI, 26 janeiru 2023 (TATOLI)—Prezidente komisaun B trata asuntu Negósiu Estranjeiru no Defeza ho Seguransa iha Parlamentu Nasionál (PN), José Agostinho Sequeira ‘Somotxo, hateten komandante Jerál Polísia Nasionál Timor-Leste (PNTL) foun tenke ema ne’ebé ho vizaun kle’an hodi lidera instituisaun ne’e.
“Komandante ne’ebé forte, hatene halo mudansa saida mak iha PNTL. Komandante foun ne’e haree labele repete beibeik problema barak hanesan kona-ba ema barak deskontenta sira-ne’ebé tama iha tinan 2000, 2001, 2002, to’o ohin loron mantein nafatin ajente. Komandante sira troka ba mai mós nafatin hela de’it. Tanba ne’e komandante ida hakarak sae, nia tenke iha vizaun kle’am ba PNTL saida mak ladi’ak hanesan infraestrutura, ierárkia ka lei ruma presiza halo mudansa,” Prezidente Komisaun B ne’e hateten ba jornalista sira iha PN relasiona ho atuál Komandante Jerál PNTL, Komisáriu Faustino da Costa, ne’ebé nia mandatu besik ramata iha tempu badak hodi kompleta tinan haat ona, kinta ne’e.
Daudaun ne’e iha ema poténsia barak sé mak bele halo mudansa ba PNTL hasoru situasaun ka problema barak atu haree iha nivél komandante jerál ne’ebé atu mai, no presiza mós ministru tutela foun atu mai ajuda haree problema PNTL nian nu’udar ema polítiku.
“Ha’u prefere komandante sira iha laran ne’ebá barak loos, hanesan superitendente xefe Natercia, Pedro Belo, ho sira seluk hatene problema loloos iha PNTL nia laran,” nia hateten.
Komisaun B rekomenda atu halo reflesaun relasiona ho komandante jerál sira-ne’ebé antes ne’e asume kna’ar tutuir malu no atuál komandante ne’ebé besik ramata ninia mandatu.
Dahuluk, nia dehan, tenke muda halo reestruturasaun ierárkia tanba komandante jerál sira liuba ne’e sira-nia serbisu halo saida hafoin termina mandatu, tanba sira seidauk iha idade tama ba reforma no presiza haree didi’ak termina iha fatin tanba eis komisáriu sira rekursu di’ak.
“Tenke haree sira-ne’ebé atu sai komisáriu, signifika atu sai ona mezmu idade ki’ik seidauk tama reforma, entaun sira-nia produtividade kontribuisaun ba PNTL laiha tiha, sira atu ba fali adidu no hala’o servisu seluk,” nia dehan.
Tan ne’e, tuir nia, presiza haree liu-liu oinsá utiliza fali rekursu bainhira Akadémia Polísia Nasionál Timor-Leste nian, eis komandante jerál sira bele sai fali dosente no bele tau iha sistema seluk.
Iha parte seluk, Deputadu Somotxo hateten durante mandatu komisáriu PNTL atuál la haree mudansa tanba ajente polísia barak reklama sira-nia karreira balun tinan 20-resin deviza ho saláriu mós nafatin.
Kestaun seluk, nia hateten, problema reforma haree membru idade 60-resin mós nafatin iha daudaun iha 200-resin no sira alezadu besik na’in-30.
“Ida-ne’e la’ós komandante Faustino da Costa mak foin mosu, maibé ida-ne’e desde komandante sira uluk to’o mai ohin loron nafatin,” nia dehan.
Notísia Relevante: Governu sei diskute nomeasaun foun ba KomJer PNTL
Jornalista : Nelson de Sousa
Editór : Cancio Ximenes
