Ekipa tékniku hosi Xina hahú observa fatin instalasaun ospitál militár

DILI, 30 marsu 2023 (TATOLI)- Ministru Defeza (MD), Filomeno da Paixão de Jesus, informa, ekipa ekipa tékniku hosi Xina iha ona Timor-Leste hodi observa fatin futuru instalasaun óspitál militár.
“Governu Xina disponivél ajuda Timor-Leste hodi konstrui ospitál militár.Tanba ne’e, sira nia tékniku sira mós hosi Xina mai ona Timor-Leste atu hahú haree fatin ba konstrusaun ospitál militár,” hateten Ministru ne’e, iha kna’ar fatin, kinta ne’e.
Konstrusaun ba futuru ospitál militár ne’e, Ministru Paixão dehan Governu Xinan maki ha prontidaun hodi ajuda Governu Timor-Leste liuhosi Ministru Defeza hodi konstrui óspitál militár.
“Planu ida ne’e, iha tinan lima ona tanba foufoun Governu Xina promete ba ha’u ne’e dehan sira sei harii ospitál militár ba Timor-Leste ho andar neen, kompostu hosi andar tolu ba médiku espesialista no andar tolu seluk ba pasiente sira”, nia afirma.
Fatin konstrusaun ospitál militár ne’e, Governu Timor-Leste iha opsaun tolu mak posibilidade sei harii iha Metinaro, Hera no bele harii iha Tibar.
“Prosesu sira ne’e tuir lolos hahú ona, maibé tanba situasaun Covid-19 durante tinan tolu halo buat sira ne’e paradu, espera katak tinan ne’e Governu Xina bele mai, atu ita renova fali planu servisu hamutuk ida ne’e no ami kontinua kontaktu ho Governu Xina kona-ba ida ne’e”, katak.
Governante ne’e rekoñese katak rekursu médiku ne’ebé atu koloka iha óspitál militár ne’e seidauk másimu, nune’e presiza prepara mós rekursu umanu.
“Ita agora iha médiku nain-11, hosi médiku hirak ne’e balun ba hasai nia kursu iha Cuba no balun hasai espasialidade, maibé kuandu rekursu ne’e la to’o sei ajuda hosi médiku sivil sira,” nia afirma.
Tanba óspitál militár la’ós ba médiku sira de’it, maibé ba ema sívil sira kuandu hetan moras entaun bele mai halo tratamentu iha óspitál ne’e no karik rekursu médiku militar sira ne’ebé koloka iha óspitál militár mak la to’o bele akonsella fali médiku sivil atu apoia.
Jornalista: Natalino Costa
Editór : Florencio Miranda Ximenes

