Baucau sei menus fasilidade saúde
BAUCAU, 03 abríl 2023 (TATOLI) – Servisu Munisipál Saúde Baucau rekoñese menus fasilidade saúde hodi difikulta atendimentu komunidade iha munisípiu refere.
Diretór Servisu Munisipál Saúde Baucau, Domingos Reinaldo da Costa Guterres, esplika, fasilidade sira-ne’ebé menus komposta hosi fasilidade hanesan transporte, rezidénsia ba pesóal saúde iha kada sentru saúde inklui akipamentu saúde hanesan médiku no la’os médiku.
“Sentru saúde hotu-hotu kuaze sei menus hotu hanesan rekursu materiál hanesan fasilidade inklui rekursu umanu,” Diretór Servisu Munisipál Saúde informa ba Agência TATOLI iha Vila Antiga, segunda ne’e.
Kuaze maioria uma hela ba pesoál saúde sira kuaze iha sentru saúde, postu no klínika sira seidauk prepara hosi ministériu nune’e difikulta atendimentu ba komunidade tanba distánsia entre sentru saúde ho pesoál saúde dook.
Ambulánsia no transporte inklui infraestrutura estrada sai mos fatór difikuldade tanba maioria sentru saúde, postu sira iha área rurál nune’e difikulta movimentu transporte asesu ba fatin saúde.
“Pesoál saúde balun hela dook entaun susar tebes, ne’e lori tempu atu hala’o atendimentu ho lalais tanba la hela besik,” Domingos Guterres akresenta.
Alende ne’e, difikuldade seluk mak ekipamentu médiku hanesan materiál partu, luvas, ekipamentu konsulta, kurativu inklui sentru saúde, postu balun sei ekipamentu no médiku hanesan meza, kadeira no almari ne’ebé seidauk sufisiente.
“Sira uza tuir kbiit, la dehan katak sasán tenke kompleta mak serbisu, sira uza tuir kapasidade no koñesementu ne’ebé iha hodi halo atendimentu,” Domingos Guterres argumenta.
Domingos Guterres hateten, Ministériu Saúde liuhosi vise-ministru saúde hala’o ona vizita hodi rejista preokupasaun inklui identifika falta fasilidade sira iha sentru saúde iha munisípiu Baucau no sei responte tuir prioridade iha kada sentru saúde.
Proposta hotu hato’o ona ba nasionál nune’e parte Saúde Munisipál Baucau kontinua aprosima no husu ministériu atubele tau konsiderasun hodi resposta ba menus fasilidade ne’ebé sentru, postu inklui klínika sira hasoru iha Baucau.
“Maske seidauk kompleta ita kontinua serbisu, tempu to’o fasilidade hotu sei aumenta,” Domingos Guterres argumenta.
Munisípiu Baucau hamutuk totál sentru saúde sia komposta hosi Uailili, Laga, Vemasse, Venilale, Quelicai, Baguia, Riamare no Bucoli inklui postu saúde hamutuk 29 ho totál funsionáriu hamutuk na’in-354.
Notísia relevante: Proposta hosi Baucau ba Ministra Saúde, transforma postu saúde Nunira
Jornalista : Natalino Belo
Editór : Evaristo Soares Martins
