DILI, 04 abril 2023 (TATOLI) – Diretór Klínika Bairo Pite, Inacio do Santos, informa husi janeiru to’o marsu mak Klínika Bairo Pite rejista moras tuberkoloze hamutuk 142.
“Iha trimestre dahuluk ita deteta kazu TB hamutuk 142, husi númeru ne’e 81 mak pozitivu konfirmadu ne’ebé ita izola sira iha Tibar”, Inacio do Santos dehan iha nia kna’ar fatin, ohin.
Nia hateten, husi pasiente sira ne’ebé deteta tuberkoloze maioria ho idade 20 to’o 40, sira halo diagnóstiku klíniku hanesan hasai X-ray depois haruka fila ba uma hafoin mai halo tratamentu lorloron, entaun husi ne’e médiku sira fó aimoruk preventivu hodi konsumu durante fulan tolu hodi prevene atu labele hadaet ba sira nia família uma-laran.
“Sira ne’ebé ita deteta TB, maibé la’os pozitivu, ne’e ita halo diagnóstiku klíniku ba sira depois ita haruka fila ba uma mak sira mai halo tratamentu lorloron no ita-nia médiku sira fó aimoruk preventivu hodi sira konsumu to’o fulan tolu nia-laran”, nia afirma.
Nia deklara, kazu tuberkoloze maioria husi Munisípiu Dili, Ermera no Bobonaro.
Nia hateten, profisionál saúde sira sei haree TB ativu sei halo tratamentu fulan neen nia-laran no tratamentu preventivu iha fulan tolu depois mak pasiente sira hemu aimoruk kada semana.
“Bainhira pasiente sira ho TB ativu sei halo tratamentu fulan neen nia-laran no sira ne’ebé tratamentu preventivu fulan tolu nia-laran ho objetivu atu prevene ba futuru”, nia esklarese.
Nia konta, husi tinan kotuk kazu pozitivu TB hamutuk 305, pasiente ne’ebé halo tratamentu husi ne’e profisionál saúde halo kontatu resin ba membru família uma-laran 1.080-resin.
“Atu halakon TB iha ita nia rain, laos servisu husi saúde de’it, maibé servisu ema hotu nian, husi individu ida-idak mak bele fó kontribuisaun, tanba ne’e tuir planu Governu katak sei deklara elemina moras TB iha 2025 tanba TB sai problema ba saúde publika iha Timor Leste”, nia konklui.
Jornalista : Felicidade Ximenes
Editór : Zezito Silva
