DILI, 05 abríl 2023 (TATOLI)– Ministériu Turizmu Komérsiu no Indústria, José Lucas do Carmo da Silva, halo aprezentasaun kona-ba relatóriu análiza kustu-benefísiu ba Adezaun Timor-Leste nian ba Akordu Provizóriu Parseria Ekonómika Pasífiku (IEPA) ho Uniaun Europeia (UE).
“Akordu Parseria Ekonómika UE-Pasífiku atu fasilita investimentu no komérsiu entre ema sira no empreza sira husi rejiaun rua, nomós fomenta dezenvolvimentu iha rejiaun Pasífiku tomak”, Ministru Prezidénsia Konsellu Ministru, Fidélis Magalhães, informa iha Palásiu Governu.
Governante ne’e esplika katak akordu ida ne’e Uniaun Europeia halo ho nasaun iha ámbitu akordu Organizasaun Nasaun Unida nian para loke dalan ba relasaun komersiál entre UE hanesan bloku ho nasaun sira.
“Karik Timor-Leste adere ba ida ne’e, sei asesu ba merkadu europeiu nian. Entaun, ne’e lakontradis ho ASEAN no lakontra malu ho OMK, maibé pelu kontráriu nia hanesan kontribui ba objetivu Timór nian ba adezaun sira, nomós sei kontribui ba ita hetan asesu merkadu no bele diversifika ekonomia nasional”, nia esklarese.
Jornalista: Antónia Gusmão
Editora: Maria Auxiliadora
