Kompañia rezolve ona estrada ligasaun Gleno ba Ermera Vila
DILI, 07 abril 2023 (TATOLI)—Ministru Obra Públika (MOP), Abel Pires da Silva, hateten kompañia ne’ebe atende estrada no ponte ne’ebé kotu iha diresaun entre Gleno ba Ermera Vila, komesa normaliza no rezolve hodi fasilita movimentasaun komunidade nian.
Ministru Abel dehan liafuan ne’e hafoin ba observa rasik kinta (06/03) ne’e katak progresu normalizasaun ka rekoperasaun estrada no ponte ne’ebé kotu iha diresaun entre Gleno ba Ermera Vila komesa rezolve ona.
“Hosi Gleno ba Ermera vila ha’u fiar katak orsida loraik ne’e parese rezolve ona, tanba daudaun ne’e kompañia rekopera ona no bele fasilita movimentasaun komunidade nian,” Abel Pires, hateten iha nota komunikadu ne’ebé Agência Tatoli, asesu.
Notisia relevante : Ministru Abel Pires orienta tékniku normaliza estrada ligasaun Gleno-Ermera Vila
Nia dehan, kompañia sira ne’ebé halo esforsu normaliza ona estrada sira ne’e, agradese tebes tanba sira nu’udar parseiru Governu nian ne’ebé iha kapasidade hodi normaliza estrada no ponte sira ne’ebé kotu imapktu hosi udan.
Relasiona ho estrada sira ne’ebé kotu, Governu liuliu MOP sei fó importánsia ba normalizasaun estrada no ponte hodi fasilita movimentasaun komunidade no transporte iha área refere.
Estrada no ponte ne’ebé kotu iha área suku Humboe nian normaliza hosi kompañia Montana Diak, estrada área Manu Kokorem hosi kompañia Monte Veado, inklui ponte ne’ebé kotu besik Ermera vila kompañia sira normaliza ona.
Jornalista : Arminda Fonseca
Editora : Armandina Moniz
