Don Virgílio Kardeál: Jesus nia-moris hias fó naroman ba ema hotu
DILI, 09 abríl 2023 (TATOLI)— Don Virgílio Kardeál do Carmo da Silva, SDB, iha nia omília ba misa domingu resureisaun, (09/4), haklalen katak Jesus nia moris hias ne’e hodi manan mate nia ukun nu’udar konkista ida hodi fó salvasaun ba umanidade no leno naroman ba ema hotu hodibele sai hosi dalan nakukun.
“Jesus nia moris hias halo ita la monu ba manobra diabu nian, hatudu katak naroman ida ne’ebé sei lamate no Jesus nia moris hias ne’e fó naroman ba ema hotu hosi jerasaun ba jerasaun”, esplika ba sarani sira iha Igreja Nossa Senhora Imaculada da Conceição, Katedral, Dili, domingu ne’e.
Jesus Kristu nia mate no moris hias ne’ebé sasin husi apostolu sira nu’udar sasin ne’ebé haklaken ba mundu tomak kona-ba fiar sarani nian. “Jesus nia mate no moris hias halo mundu fiar katak Maromak nia kbiit liubuat hotu”, haklaken.
Nune’e, Don Virgílio Kardeál haklaken katak Jesus nia moris hias ne’e hanesan naroman ne’ebé mai atu leno ema-nia hotu ne’ebé moris iha nakukun laran, naroman ne’ebé serve mai hirak ne’ebé durante loron 40 ka iha tempu kuarezma prepara nia-an mak naroman bele tama iha nia fuan.
“Páskua ita selebra istória ida nia naran, pásku la’ós eventu bainbain ka inisiativa ita ema nian, maibé páskua pesoa, hanesan Saun Paulo dehan, Kristu mak ita-nia páskua nia mak bolu no sai ita razaun ba ita-nia selebrasaun páskua ninian. Kristu mak saran nia-an ba mate hodi salva umanidade”, katak.
Jesus nia mate no moris hias fó konsolasaun ba ema tanba fatuk ne’ebé iha rate nia ibun, hasai tiha ona, maske provizoriamente sei iha ne’ebá, fatuk ne’ebé haketak ne’e katak, haketak ona mate no moris, nakukun ho naroman, laiha tan ona fatuk ne’ebé impede sai obstákulu ba ema atu ba iha moris foun ida ne’e.
“Jesus nia moris hias ne’e, konvida ita hotu atu haksolok selebra hananu ‘alleluia Jesus moris hias duni”.
Bainhira, tuir Maromak nia planu, diabu sei la ukun ita no sei la monu nomós aseita ho diabu nia tentasaun atu monu ba sala no sai sala nia atan.
“Ita fiar Maromak, fiar ba Jesus nia moris hias ita moris hias hamutuk hikas ho nia hodi hetan moris foun”, konklui.
Jornalista : Arminda Fonseca/Felicidade Ximenes
Editór : Florencio Miranda Ximenes
