DILI, 11 abril 2023 (TATOLI)— Autoridade Inspesaun no Fiskalizasaun Atividade Ekonómika, Sanitária no Alimentár, Institutu Públiku (AIFAESA,I.P) iha trimestre dahuluk hosi janeiru to’o marsu 2023, ezekuta ona Orsamentu Jerál Estadu (OJE) tinan 2023 ne’ebé atinje 17% ($13,560).
“Orsamentu ne’ebé ita-nia Governu aloka mai AIFAESA,I.P hamutuk $25,418.00, no ita ezekuta ona $13,560 ho nia pursentu 17,” Inspetór Jerál AIFAESA,I.P, Ernesto Monteiro dehan ba Agência Tatoli, iha nia knaar-fatin, Matadoru, Dili, tersa ne’e.
Nia dehan, hosi ezekusaun OJE 2023, ba trismestre dahuluk nian ne’e nia progresu mak, AIFAESA,I.P kontinua nia planu no programa sira, hanesan, atividade rutina halao inspesaun ba loja sira iha territóriu laran hodi kontrola ba produtu ne’ebé iha.
Notisia relevante : Janeiru-marsu 2023, AIFAESA,I.P prosesa ona empreza ualu ba Ministériu Públiku
“Ita-nia progresu ida mak, ita deteta operadór ekonómiku sira ne’ebé halo espekulasaun ba produtu sira liuliu produtu non alkoólika no masin-midar, inklui ita mós indentifika empreza sira ne’ebé komete infrasaun administrativa sira,” nia dehan.
Kona-ba dezafiu sira ne’ebé AIFAESA,I.P hasoru iha ezekuasaun OJE 2023 mak, transporte. Tanba AIFAESA,I.P rasik daudaun ne’e iha deit transporte hitu hodi kobre ba munisípiu hotu. Ho ida ne’e, dalaruma karreta sira ne’e balu kondisaun ladiak no fo impaktu ba atividade inspesaun mós paradu.
“Preokupasaun sira ne’e, ami husu tiha ona ba Ministériu Finansa atu aumenta karreta lima maibé to’o agora seidauk iha desizaun,” Ernesto hateten.
Notisia relevante : AIFAESA,I.P sei prosesa empreza importadór haat ba Ministériu Públiku
Ho dezafiu no difikuldade sira ne’ebé esforsu AIFAESA,I.P halo mak koopera nafatin ho instituisaun no autoridade inklui konsumidór sira hotu, atu apoiu nafatin AIFAESA,I.P hodi fó informasaun sira relasiona operadór ekonómiku ne’ebé komete infrasaun ruma.
Jornalista : Arminda Fonseca
Editora : Armandina Moniz
